EULEX bartë doganierët në veri, nuk tregon koston
EULEX-i vazhdon ta bëjë transportin me helikopterë të policëve dhe doganierëve kosovarë, në pikat 1 e 31 në Jarinjë dhe Bërnjak, që pas aksionit të Qeverisë më 25 korrikut të vitit të kaluar - për shtrirjen e autoriteti edhe në veri të vendit. Telegrafi ka kontaktuar zyrtarë të këtij misioni në Kosovë për të mësuar koston e transportit të doganierëve. Por kjo, sipas tyre, është çështje e brendshme e EULEX-it. Qeveria e Kosovës kishte marrë aksionit për shtrirjen e autoritet të Institucioneve të Kosovës edhe në pikat kufitare në veri të vendit, më 25 korrik të vitit të kaluar. Mirëpo, për me shumë se një vit doganierët dhe policët kufitarë të Kosovës nuk mund të shkojnë nëpërmjet rrugëve toksore në ato pika.
Zëdhënësi i EULEX-it Blerim Krasniqi, ka konfirmuar për Telegrafin se EULEX-i vazhdon t'i dërgojë për në pikat kufitare në veri doganierët dhe policët. Ai nuk ka treguar se sa i kushton Misionit Evropian për Sundim të Ligjit, bartja e këtyre zyrtarëve.
“EULEX-i vazhdon të transportojë zyrtarët e Doganës dhe Policisë së Kosovës në pikë-kalimet 1 dhe 31. Shuma që EULEX-i shpenzon për transportin ajror në këto dy pika është çështje e brendshme e misionit dhe për detaje operacionale ne nuk komentojmë”, theksoi Krasniqi.
Ndërkaq Drejtori i Doganave të Kosovës,, Naim Huruglica, e vlerëson ndihmën e EULEX-it për transportin e doganierëve për në pikat kufitare. Ai thotë se koston e transporti e bartë ky mision.
“Te helikopteri, shpenzimet - për bartjen e oficerëve tanë - vazhdojnë të jenë të EULEX-it. Faktikisht, EULEX-i ka një kontratë me një kompani për transport dhe çdo ditë, një herë në ditë, bëhet ndërrimi në dy pikat kufitare. Oficerët e Doganës dhe të Policisë hipin në helikopter dhe shkojnë në atë pjesë dhe në kthim i marrin oficerët që kanë qenë në turnin e përparshëm”, tha Huruglica.
Ndryshe pjesa veriore e Kosovës ka qenë problematike që nga pas lufta, por situata është përkeqësuar pas djegies së dy portave kufitare më 17 shkurt 2008, pas shpalljes së pavarësisë së Kosovës. /Telegrafi/
