Financimi i dy autostradave njëkohësisht rrezikon me bankrotim të shtetit

Zyrtarët e lartë të kabinetit shprehen këmbëngulës që në vitin 2013 të fillojë ndërtimi i autostradës Prishtinë-Han i Elezit, e njëkohësisht të vazhdojë ndërtimin e seksioneve të radhës të autostradës Morinë-Merdar. Por, këmbëngulësia e Qeveria bie ndesh me marrëveshjen e nënshkruar me Fondin Monetar Ndërkombëtar, ku thuhet se fillimisht duhet të plotësohen një varg kriteresh, pastaj të vendoset për financimin e autostradave nga buxheti.

Po ashtu, gjatë negociatave, FMN-ja i pati bërë me dije Qeverisë që nuk bën të financojë dy autostrada njëkohësisht, meqë në këtë mënyrë shteti bankroton financiarisht pas futjes në obligime kontraktuale. Opsioni për ndërprerjen e punimeve për ndërtimin e “Rrugës 7” në pjesën ku ajo takohet me magjistralen Prishtinë-Pejë është mohuar nga ministri i Infrastrukturës, Femi Mujota. Po sipas planit të Qeverisë, që në fillimin e vitit 2013 do të nisë ndërtimi i “Rrugës 6”, Prishtinë-Han i Elezit.

Sipas tij, Qeveria ka pëlqimin e FMN-së për këto dy projekte.

Lideri i opozitës në vend, Isa Mustafa, në intervistën dhënë “Kohës Ditore”, ka bërë me dije se Kosova nuk është e gatshme financiarisht të përballojë ndërtimin e autostradës Prishtinë-Han i Elezit. Ai ka thënë se është shpenzuar shumë për autostradën e kombit të cilin e ka cilësuar si projekt shumë të shtrenjtë.

Edhe njohësi i çështjeve ekonomike, drejtori i institutit “Riinvest”, Lumir Abdixhiku, ka ngritur dyshime për bankrotim të shtetit në rast të këmbëngulësisë së Qeverisë për financimin e “Rrugës 6”, shkruan “Koha Ditore”. /Telegrafi/