FOL: PTK-ja kampione e shkeljeve

Gjatë një konference për media, FOL ka shfaqur të gjeturat e këtij raporti, i cili tregon shkeljet ligjore që janë bërë në fushën e prokurimit publik.

Menaxheri i projektit, Kenan Tore, ka thënë se në raportin e kësaj organizate, për nga shkeljet ligjore prinë PTK-ja, e ndjekur nga KEK-u, disa ministri dhe komuna. “Kampion i shkeljeve ligjore, të bëra në fushën e prokurimit publik, ka dalë PTK-ja me gjithsej katër tender. Në këtë periudhë kohore institucionet e lartpërmendura, ndërmarrjet publike, gjegjësisht KEK-u dhe PTK-ja, ministritë dhe komunat kanë bërë shkelje ligjore në 18 gjithsej, tenderë të ndryshëm. Nga këta 18 tenderë, OShP-ja në 11 prej tyre ka urdhëruar që të kthehen në rivlerësim, pesë janë kthyer në ritenderim dhe në një aktivitet prokurimi, pasi që janë evidentuar shkeljet, është anuluar me kërkesën e autoritetit kontraktues kurse në një aktivitet tjetër të prokurimit autoriteti kontraktues është gjobitur me gjobë”, tha ai.

Kurse sa i përket shkeljeve të ministrive, ato kanë bërë shkelje në gjithsej katër tenderëve, ku Ministria e Forcës së Sigurisë së Kosovës ka bërë shkelje në dy prej aktiviteteve të prokurimit publik, Ministria e Kulturës Rinisë dhe Sport ka bërë shkelje në një aktivitet dhe Ministria e Punëve të Jashtme ka bërë shkelje në një aktivitet të prokurimit.

Ndërmarrjet publike si KEK dhe PTK, gjatë kësaj periudhe, nuk i kanë zbatuar procedurat e prokurimit publik konform ligjit në 7 tenderë të ndryshëm. Në këtë drejtim, PTK ka bërë shkelje ligjore në katër aktivitete të ndryshme të prokurimit, kurse KEK në tri sosh. “Dëmi i përllogaritur i këtyre shkeljeve gjatë këtij tremujori është më shumë se 3 milionë euro”, ka thënë Tore. /Telegrafi/