Fond për mjedisin
Ministri i Mjedisit dhe Planifikimit Hapësinor (MMPH), Dardan Gashi, tha se të gjitha taksat që mblidhen në emër të mbrojtjes së mjedisit, siç është taksa ekologjike, do të dedikohen vetëm për këtë sferë e jo për aspekte tjera. Në një konferencë për media ai paralajmëroi edhe krijimin e fondit të mjedisit si dhe foli për projektet e zhvilluara gjatë gjysmës së parë të vitit, dhe ato në vijim.
Taksa ekologjike, e cila ka filluar të zbatohet që nga një korriku i këtij viti në automjete dhe taksat tjera që mblidhen në emër të mbrojtjes së mjedisit do të menaxhohen nga ministria e mjedisit dhe planifikimit hapësinor.
Ministri Dardan Gashi, tha se mjetet e grumbulluara nga këto taksa do të përdoren për riparimin e dëmeve mjedisore të shkaktuara në të kaluarën. “Për të siguruar se këto mjete do të derdhen në fonde për përmirësimin e çështjeve mjedisore në Kosovë, Ministria është duke përgatitur Ligjin për fondin e mjedisit, që është duke u punuar në bashkëpunim me Ministrinë e Financave dhe ky ligj shpresoj dhe jam i sigurt se do të kalojë këtë vit edhe në Kuvendin e RK-së. Ky ligj do të mundësojë që çdo taksë që mblidhet tani dhe në të ardhmen, do të dedikohet për mbrojtjen e mjedisit”, tha Gashi.
Sa i përket varrezës së automjeteve, ministri Gashi theksoi se ka përfunduar udhëzimi administrativ i cili pritet të hyjë në fuqi javën tjetër, përmes të cilit përcaktohen kushte të reja teknike që duhet t’i përmbushin kompanitë brenda afatit 90 ditësh. “Kompanitë duhet të sigurojnë që materialet e rrezikshme të nxjerra nga makina, siç janë vajet e përdorura, acidet nga bateritë etj, duhet të vendosen në kontejnerë të caktuar dhe nuk mund të lihen siç ka qenë deri tash nëpër tokë, nëpër kanalizime apo nëpër lumenj. Ato kompani që janë të gatshme t’i bëjnë këto investime, do të mund të vazhdojnë punën, ato që nuk janë të gatshme, do të mbyllen”, tha Gashi.
Ndër të arriturat e këtij gjysmëviti, Gashi përmendi edhe një varg ligjesh të miratuara. /Telegrafi/
