Fondet do ta shpëtojnë euron
Kreu i Eurogrupit, Jean Claude Juncker, tha për gazetën “Sueddeutsche Zeitung” se, vendet që ndajnë monedhën e përbashkët, fondet e shpëtimit të shteteve dhe Bankën Qendrore Europiane, së shpejti do të hidhen në veprim për të shpëtuar Eurozonën. Sipas tij, gjatë ditëve të ardhshme do të bëhen të ditura edhe masat që do të ndërmerren për të luftuar krizën e borxhit.Juncker u shpreh se, Mekanizmi Europian i Stabilitetit Financiar dhe Banka Qendrore Europiane do të blenë borxhin qeveritar spanjoll, për të ulur yeld-et, pasi, krerët e Bashkimit Europian bënë gati terrenin për mënyrën e blerjes së bonove nga fondet e shpëtimit, në samitin e qershorit.
Kreu i Eurogrupit nënvizoi se, nuk kishte dyshime, sa i përket zbatimit të vendimeve të këtij samiti. Deklarata e tij duket se ka qenë konfirmimi i parë zyrtar në media se, krerët europiane po hartojnë një plan për të blerë borxhet qeveritare të Spanjës dhe Italisë, nëpërmjet Bankës Qendrore Europiane dhe fondeve të shpëtimit.
Jucker tha se, vendet e Eurozonës kanë arritur në një pikë, në të cilën duhet treguar me të gjitha mjetet në dispozicion se, të gjithë janë të angazhuar në maksimum për të siguruar qëndrueshmërinë financiare të monedhës së përbashkët. /Telegrafi/
