Fushë Kosova bëhet me qendër për regjistrimin e bizneseve
Zëvendëskryeministrja dhe ministrja e Tregtisë dhe Industrisë, Mimoza Kusari – Lila, së bashku me kryetarin e Komunës së Fushë – Kosovës, Burim Berisha, hapën qendrën për regjistrim të biznesit, duke e bërë hapjen e 26-të të këtyre qendrave në gjithë Kosovën.Ministrja Kusari – Lila tha se reformat për përmirësimin e ambientit për të bërë biznes pret të reflektohen në raportin e Bankës Botërore për të bërë biznes. “Ne kemi ndërmarrë një mori reformash të cilat jam e sigurt që do ta nxjerrin Kosovën në një pozitë më të mirë në raportin e Bankës Botërore, por ne nuk do të kënaqemi me kaq. Reformat po vazhdojnë dhe do të jenë pjesë e agjendës tonë deri sa Kosova të jetë një nga vendet top reformatore për të bërit biznes”, tha Kusari-Lila.
Ajo shtoi se hapja e kësaj qendre do t’ua lehtësojë bizneseve nga kjo komunë punën, duke marrë parasysh që të gjitha shërbimet për biznes mund të merren nga kjo qendër.
Ndërsa, kryetari i Komunës së Fushë-Kosovës Burim Berisha se ndjehet i lumtur që tashmë bizneset nga komuna që ai drejton do ta kenë më të lehtë regjistrimin dhe marrjen e informatave të nevojshme: Ne kemi shpreh gatishmëri dhe bashkëpunim për hapjen e kësaj qendre. “E falënderojmë Ministrinë e Tregtisë dhe Industrisë dhe Bankën Botërore për pajisjet që na janë ofruar si dhe trajnimin e stafit”, theksoi Berisha.
Ministria e Tregtisë dhe Industrisë është e përkushtuar të punojë në përmirësimin e mëtejmë të ambientit për të bërë biznes
Në vitin 2011 në komunën e Fushë-Kosovës janë regjistruar 192 biznese, ndërsa këtë vit u regjistruan 188. /Telegrafi/
