Gjakovë, në terr spitali i qytetit
KEK-u ka njoftuar se kompania “EURO-ING“ Rahovec, të hënën gjatë punimeve në sheshin “Skënderbeu“ në Gjakovë, afër TS – 76 ka dëmtuar dy kabllo nëntokësore -IPO (3x185mm²) Al. Si pasojë e kësaj kanë mbetur pa energji elektrike, Spitali i qytetit “Isa Grezda” dhe Spitali “Fati Im”. Ekipet e Mirëmbajtjes së KEK-ut kanë bërë të pamundurën duke bërë furnizim alternative nga dalja “Elektromotori-Deva“. KEK-u kërkon nga ky kontraktor që dëmin e shkaktuar ta kompensoj sa më shpejt. Kjo nuk është hera e parë që kontraktorët punëkryes të komunave po dëmtojnë kabllot e KEK-ut duke i lënë konsumatorët e korporatës pa energji elektrike dhe po ashtu po dëmtojnë imazhin e Korporatës.
"KEK kërkon në këtë situatë si nga Komuna e Gjakovës, ashtu edhe nga të gjithë kontraktorët punëkryes që të marrin hartat e vendosjes së kabllove nëntokësore dhe të kenë kujdes të mos i prekin kabllot. KEK kërkon edhe nga Inspektorati komunal i punës që të ndërmarrë masa në këtë drejtim", thuhet në njoftimin e KEK-ut. /Telegrafi/
