Gjermani, paralajmërohet krizë për pensionet
Ministrja gjermane e Punës, Ursula von der Leyen paralajmëron se të punësuarit e sotëm gjermanë do të kenë pensione tepër të vogla në vitin 2030. Por receta e saj kundër varfërisë ka shkaktuar kritika. Tabela më e re e pensioneve është shokuese, shkruan gazeta bulevardeske "Bild am Sonntag”. Ajo prezanton të dhënat dhe vlerësimet e ministrisë së Punës, sipas së cilave ata që sot në Gjermani fitojnë 2500 euro bruto në muaj dhe kanë punuar 35 vjet, në vitin 2030 do të kenë një pension prej vetëm 688 euro.
Momentalisht kjo shumë shënon edhe kufirin zyrtar të varfërisë në Gjermani. Ata që kanë më pak se kjo shumë në muaj duhet të marrin ndihma për ekzistencën minimale.
Kufiri i varfërisë nuk cenon vetëm gratë e papuna, personat që punojnë me kohë të kufizuar, apo ata që fitojnë pak, por secilin, alarmon mesazhi i Ursula von der Leyen.
Gjermanët kanë nevojë për një sigurim shtesë për kohën e pensioneve. Problemi nuk është i ri, sepse njerëzit në Gjermani, për fat të mirë, po jetojnë gjithnjë e më gjatë. Por njerëzit që jetojnë më gjatë duhet të paguhen edhe më gjatë.
Gati një e treta e të punësuarve në Gjermani fiton më pak se 2500 euro bruto në muaj. Kjo rrezikon edhe gjeneratat e ardhshme. Pensionet e ulëta nuk janë problemi i vetëm. Një pension për sigurimin e ekzistencës duhet të marrin të gjithë, edhe ata të cilët kanë paguar pak apo aspak në fondin e pensioneve. /Telegrafi/
