Gjermania para recesionit
Atmosfera në ekonominë gjermane po keqësohet, porositë nga jashtë vendit po bien në mënyrë dramatike, firma të mëdha vendosin të punohet më pak. Ndaj pyetjes, se si e vlerësojnë gjendjen e tyre ekonomike aktuale, gjithnjë e më shumë sipërmarrës gjermanë përgjigjen me: jo aq të mirë.
Një numër i tyre sa vjen e në rritje thotë se nuk presin gjë të mirë nga e ardhmja. Instituti për kërkime ekonomike nga Mynihu, ifo, pyet çdo muaj rreth 7.000 sipërmarrës gjermanë dhe llogarit më pas ”indeksin e klimës së biznesit”.
Drejtori i institutit, Hans-Werner Sinn, e përmblodhi javën e kaluar studimin aktual me këto fjalë:"Kriza e euros ushtron gjithnjë e më shumë ndikim negativ mbi koniunkturën në Gjermani."
Deri tani në ekonominë gjermane shihen vetëm "vrenjtje", thotë në bisedë me Deutsche Welle-n Heiko Peters, analist në bankën Deutsche Bank. Njëherë, një barometër atmosfere si treguesi i klimës së biznesit është një "indikator i butë".
Aktualisht "përkeqësimi nuk shfaqet ende te indikatorët e fortë të koniunkturës, si prodhimi, hyrja e porosive dhe xhirot në shitjet te konsumatori".
Mirëpo, në rast se atmosfera nuk përmirësohet sërish, atëherë kjo gjë do të pasqyrohet së shpejti edhe te këta tregues të fortë; në fund të fundit edhe Gjermania e ndjen depresionin evropian, thotë Peters. Kjo mund të ndodhë në të ardhmen e afërt, shton ai, pasi Deutsche Bank pret që koniunktura gjermane “të shfaqet më e dobët” në gjysmën e dytë të vitit. /Telegrafi/
