Gjykata bllokon shitjen e 18 ndërmarrjeve

Ky vendim i Odës së Posaçme ka djegur të gjitha shpenzimet e promovimit të ndërmarrjes, pasi që kjo e fundit është hequr nga lista aktive e privatizimit.Nën masat e përkohshme të Gjykatës Supreme të Kosovës nuk është vetëm fabrika “Virgjina”, por edhe 17 ndërmarrje tjera shoqërore.

Zëdhënësi i AKP-së, Ylli Kaloshi, pohon për “Zëri” se Agjencia Kosovare e Privatizimit ka pranuar masë të përkohshme (urdhër gjyqësor) ndaj ndërmarrjes së re “Fabrika për përpunimin e Duhanit “Virgjinia”, me çka pezullohet privatizimi i kësaj ndërmarrjeje deri në vendimin e ardhshëm të kësaj gjykate.

Sipas tij, edhe pse është e drejtë ligjore e Dhomës së Posaçme të Gjykatës Supreme të Kosovës, e cila ka autoritet mbi AKP-në, për të vendosur masë të përkohshme në rastet kontestimore, si masë për sigurimin e kërkesës së paditësit, këto vendime në disa raste po shkaktojnë vështirësi të shumanshme për Agjencinë, siç është rasti me vendimin e fundit për fabrikën “Virgjinia”.

Ai sqaron se për promovimin e kësaj ndërmarrjeje AKP ka shpenzuar për marketing 3319 euro në televizione, 1440 euro për reklamime në gazeta, 1850 euro në reklama televizive, 50 euro në shtypjen e broshurave, apo mbi 6600 euro shpenzime të përgjithshme. “Sa i përket çështjes së dëmeve, shikuar nga aspekti i politikave primare të AKP-së ato paraqesin një ndalje të procesit të privatizimit të NSH-ve, të cilat janë me masë ndalimit të përkohshëm”, potencon Kaloshi.

Edhe kryetari i Bashkimit të Sindikatave të Punëtorëve të Kosovës, Haxhi Arifi, i cili është propozuar përsëri nga Qeveria për anëtar të Bordit të Drejtorëve të AKP-së, thotë se lëndë të shumta mbesin me vite pa u shqyrtuar nga Oda e Veçantë, e cila i neglizhon jashtëzakonisht shumë vendimet.“Shumë lëndë mbesin me vite pa u shqyrtuar në Odën e Veçantë dhe ky institucion nuk ka treguar efikasitet në punë”, shprehet Arifi, duke shtuar se Oda i vonon jashtëzakonisht shumë edhe vendimet për 20 përqindëshin e punëtorëve nga ndërmarrjet e privatizuara.

Përndryshe, afati i vlefshmërisë së masës së përkohshme është i caktuar me vendimin e kolegjit gjykues për çështjen e caktuar kontestimore, ai zakonisht është i lidhur deri në marrjen e vendimit përfundimtar ,por në raste të veçanta lëshohet për kohë të caktuar dhe gjykata do të zgjas afatin sipas parashtresës së palës.

Masa e përkohshme është mjet për sigurimin e kërkesë së padisë, ajo është e lidhur me vendimin përfundimtar në çështjen kontestimore dhe zakonisht përfundon kur kolegji gjykues të merr vendimin lidhur me kërkesë padinë, prandaj ajo është e vlefshme për aq kohë sa çështja kontestimore nuk ka marr një vendim përfundimtar. /Telegrafi/