Greva në “Trepçë” nuk ndalet pa u larguar Ujkani
Minatorët e “Trepçës” nuk do të heqin dorë nga greva derisa të mos largohet Eset Ujkani, i cili është emëruar ushtrues detyre i drejtorit në këtë ndërmarrje. Ata kërkojnë nga Agjencia Kosovare e Privatizimit (AKP) që ta largojnë nga kjo pozitë Ujkanin dhe të emërojnë një menaxher të ligjshëm.Nëse nuk merren parasysh kërkesat e tyre, ata kanë bërë me dije se do të ndërmarrin hapa më radikalë. Ata konsiderojnë se ky person është emëruar në këtë pozitë për të shkatëruar asetet e “Trepçës”.
Ndërsa, Agjencia Kosovare e Privatizimit, shpreh shqetësimin e saj për grevën e organizuar nga grupe punonjësish në ndërmarrjen shoqërore “Trepça”, nën administrimin e AKP-së, shkruan “Zëri”.
Në një komunikatë për media AKP sqaron se pas pranimit të dorëheqjes së drejtorit menaxhues të “Trepçës” Ferat Shalës, me efekt nga data 16.07.2012 dhe shkuarjes së tij në pushim vjetor, në bazë të ligjit të AKP-së drejtimi i përkohshëm i punës ditore, si ushtrues detyre i është kaluar zëvendësit Eset Ujkani.
Nazir Behrami, kryetari i Sindikatës të Minatorëve, e ka vlerësuar si të paligjshëm emërimin e Eset Ujkanit si menaxher të ri të “Trepçës”. Sipas tij, e tërë kjo lojë po zhvillohet me qëllimin për t’i shkatërruar asetet e këtij gjigandi ekonomik.
“AKP kërkon nga të gjithë punonjësit e ndërmarrjes ‘Trepça’ që të vazhdojnë punën dhe të përmbushin detyrat dhe obligimet duke respektuar kontratat e tyre të punës”, thuhet në komunikatë. /Telegrafi/
