Gruri, rezerva e parë shtetërore
Krijimi i rezervave shtetërore është kthyer në realitet të hënën, pasi që është shpallur tenderi “Shërbimet e deponimit të grurit si rezervë shtetërore”. Komuniteti i biznesit vlerëson këtë hap nga ana e Ministrisë së Tregtisë dhe Industrisë (MTI), edhe pse vlerësojnë se një hap i tillë është i vonuar shumë kur dihet që Ligji për Rezervat Shtetërore, është miratuar para dy vitesh.Agim Shahini, kryetari i Aleancës Kosovare të Bizneseve (AKB), ka pohuar për “Tribuna Shqiptare” se rezervat shtetërore do të jenë të rëndësishme për mbrojtjen e konsumatorëve të vendit. “Shpallja e tenderit për rezerva shtetërore nga MTI është një hap i mirë i cili do të stabilizon sado pak çmimet në raste të fatkeqësive të ndryshme, ngritjes së bursave dhe rezervat do të jenë një stabilizues i mirë i tregut sa i përket bukës i cili është një produkt shumë sensitiv dhe kjo do të ndikojë pozitivisht në stabilitetin dhe sigurinë konsumuese”, është shprehur Shahini.
Sipas tij, ky hap është pak i vonuar, ngase Ligji për Rezerva Shtetërore është aprovuar tash e disa vite, kurse hapi për të krijuar rezervat është ndërmarr ditëve të fundit.
“Megjithatë është hap pozitiv dhe ne mbështesim këto iniciativa dhe inkurajojmë që sa më shpejtë të krijohen rezervat edhe të produkteve tjera ushqimore me të cilat konsumatori kosovar do të ndjej vetën më të sigurt, por edhe tek tregtarët do të ndikojë pozitivisht, sepse nuk mund të lëvizin çmimet sipas dëshirave të tyre, ngase do të frikohen se shteti mund që në çdo moment t’i lëshoi rezervat e veta shtetërore në shitje dhe kjo do të krijon një stabilitet të çmimeve”, theksoi Shahini. /Telegrafi/
