Hapet panairi “AGROKOS 2012”
Kompani të ndryshme nga Kosova dhe rajoni, si Shqipëria, Maqedonia e vende të tjera, po marrin pjesë në Panairin Ndërkombëtar të Agrobiznesit, Ushqimit dhe Pijeve “AGROKOS 2012”, organizuar nga CEO – Congress & Event Organization, i cili u hap të hënën në Prishtinë.Përfaqësuesi i CEO-s, Bekim Xhafa, në hapje të panairit, tha se edicioni i 12-të i Panairit Ndërkombëtar të Agrobiznesit tregon traditën dhe se është një garanci e mirë që panairet të cilat mbahen në Prishtinë janë të qëndrueshëm. Ai tha se ndihet i privilegjuar që në këtë panair janë pjesëmarrës dhe prodhime nga Shqipëria të cilat janë sjellë për tregun kosovar. “Ndihem i privilegjuar që këtë vit për herë të parë kemi një pavijon me prodhime shqiptare të mbështetur nga qeveria shqiptare dhe zyra e USAID-it në Shqipëri, të cilët janë prezent sot këtu dhe ekspozojnë në këtë panair shumë prodhime të vajrave të ullirit, agrumet shqiptare dhe shumë produkte interesante që i kanë sjellë për tregun tonë në Kosovë. Ndihem shumë i privilegjuar që kemi edhe përkrahjen e qeverisë së Maqedonisë, nëpërmjet zyrës së përkrahjes së investimeve në Kosovë”, tha ai.
Të pranishëm në panair përveç prodhuesve kosovar ishin edhe agrobizneset nga Shqipëria dhe Ulqini.
Christophe Lang, zëvendësdrejtor i SDC Prishtinë dhe David J. Anderson nga USAID, falënderuan organizatat të cilat kanë mundësuar mbajtjen e këtij evenimenti. Aktivitetet e tilla, sipas tyre, duhet të bëhen shumë më shpesh në Kosovë, në mënyrë që kompanitë e ndryshme të jenë më aktive dhe suksesi të jetë më i madh, si rezultat i një pune më të madhe që duhet bërë nga fermerët.
Ndryshe, Panairi Ndërkombëtar i Agrobiznesit “Agrokos 2012” do të mbahet deri me 1 nëntor. Edhe pse ishte paraparë që paralel me këtë panair të mbahet edhe një aktivitet tjetër, Festivali “Food and Drink Fest”, ai është anuluar për shkak të motit. /Telegrafi/
