I ndëshkojnë për protestë
Korporata Energjetike e Kosovës (KEK) do të marrë masa për punëtorët, të cilët lanë punën për të dalë në protestë javën e kaluar. Më të rrezikuarit janë ata që punojnë në prodhim e shpërndarje. Atyre do t’u hiqet mëditja për dy orë, aq kohë sa ata ishin në protestë. Sindikalistët thonë se ky është edhe një kërcënim tjetër i menaxhmentit.Punëtorët e KEK-ut zgjodhën protestën si formë për të kërkuar të drejtat e tyre në vendet e punës. Por me këtë veprim, ata jo që nuk përfituan asgjë, por humbën edhe më shumë. Menaxhmenti i Korporatës Energjetike të Kosovës pritet që t’i ndëshkojë ata punëtorë që lëshuan punën për të dalë në protestën e organizuar javën e kaluar nga Sindikata e Punëtorëve të kësaj korporate.
Si ndëshkim, atyre do t’iu hiqet mëditja apo paratë që ju takojnë për dy orë pune, aq kohë sa ata kishin qëndruar jashtë vendit të punës.
Udhëheqësit e Sindikatës së Punëtorëve të KEK-ut thonë se kjo është edhe një padrejtësi ndaj punëtorëve, pasi protestat janë të lejuara me të gjitha rregullat sindikale. E sipas zyrtarëve të Korporatës, ende nuk dihet se çfarë masash do të ndërmerren për këtë rast.
Për kryetarin e Sindikatës së Pavarur të Energjetikës (SPEK), Izet Mustafa, paralajmërimet për heqjen e mëditjeve për punëtorët, janë edhe një kërcënim tjetër ndaj tyre. “Menaxhmneti ka bërë kërcënime me heqjen e mëditjeve si dhe akuza ndaj punëtorëve se pse ata kishin qenë pjesëmarrës në protestë”, thekson Mustafa.
Kurse zëdhënësi i KEK-ut, Viktor Buzhala thotë se deri më tash, Korporata nuk ka marrë asnjë veprim për heqjen e mëditjeve për punëtorët, të cilët kishin protestuat ditë më parë. “Për punëtorët që e kanë lëshuar vendin e punës pa asnjë paralajmërim, e të cilët kanë qenë duke punuar në makineri kyçe, që ndikojnë në prodhim e shpërndarje, do të shikohet se çfarë masash do të merren”, tha Buzhala. /Telegrafi/
