Investimet e huaja në patundshmëri
Investimet e Huaja Direkte (IHD) po orientohen kryesisht në patundshmëri dhe në sektorin e ndërtimtarisë. Kështu thotë raporti i vitit 2011 i Bankës Qendrore të Kosovës (BQK), ku bëhet e ditur se 32.8 për qind e Investimeve të Huaja janë të orientuara në këtë sektor, 16 për qind në patundshmëri, 12.6 për qind në prodhimtari, 11.7 për qind në sektorin financiar, përcjellë nga sektori i transportit dhe telekomunikacionit me një pjesëmarrje prej 5.9 për qind të gjithsej IHD-ve. Sipas këtij raporti, industria e procesimit ka shënuar një rënie të theksuar gjatë kësaj periudhe, ndërsa rritja më e lartë vërehet në sektorin e ndërtimtarisë, si dhe sektorin e transportit dhe telekomunikacionit.Vendet e BE-së vazhdojnë të paraqesin burimin kryesor të IHD-ve në Kosovë. Raporti paraqet Britaninë e Madhe si vendin prej nga kanë ardhur më së shumti IHD në Kosovë, 29.6 për qind. Rritje të theksuar të IHD-ve ka pasur edhe nga Turqia, që gjatë kësaj periudhe paraqet vendin e tretë për nga shuma e IHD-ve. Përveç këtyre, Zvicra, Austria, Sllovenia dhe SHBA-ja, vazhdojnë të jenë vende me nivel të konsiderueshëm të IHD-ve në Kosovë.
Eksperti i ekonomisë, Muhamet Sadiku, thotë se Kosova ende nuk ka ndërtuar ambient miqësor për investitorët e jashtëm, ngase përballet me probleme të shumta. “Bërja e biznesit në Kosovë ka probleme të mëdha. Kosova ende nuk ka ndërtuar ambientin biznesor miqësor për investitorët e jashtëm, por besoj se kjo vlen edhe për investitorë të brendshëm, kjo ka bërë që Kosova të ketë probleme me forcimin e sektorit prodhues privat. Vendi nuk e ka gjetur ende rrugën për riindustralizimin e vet dhe pritjet kanë qenë të mëdha që pas shpalljes së pavarësisë do të kemi vërshim të investitorëve”, tha Sadiku, shkruan Zëri.
Ndërsa Ibrahim Rexhepi, njohës i çështjeve ekonomike, thotë se është e rëndësishme që jo vetëm të dihet se prej nga cili vend e ka prejardhjen ky kapital, por edhe individi i cili investon në Kosovë. “Ka disa indikacione që këto investime mund të jenë të qytetarëve të Kosovës, të cilët për kohë të gjatë jetojnë jashtë vendit. Kapitali tash për tash në Kosovë është një investim që është më i sigurt dhe ka kthim shumë më të shpejtë për shkak të rritjes së vlerës të patundshmërive”, ka thënë Rexhepi. /Telegrafi/
