Kamatat po ngulfasin bizneset

Guvernator i Bankës Qendrore të Kosovës (BQK), Gani Gërguri, thotë se kamatat në vend mbeten të larta, por me një trend të rënies. “Të dhënat e fundit tregojnë për një trend të rënies së kamatave. Ato ende mbesin të larta, jo shumë të larta në krahasim me regjionin, mirëpo kur ta vlerësojmë normën e kamatës dhe lartësinë e saj, ne nuk duhet të harruar asnjëherë se jemi një vend i euroizuar në mënyrë unilaterale, e ky është faktori numër një. Është një listë e gjerë faktorësh që ndikojnë në koston e ndërmjetësimit financiar. Njëri prej tyre, kryesori, është puna jonë e mëtejme në përmirësimin e ambientit për biznes edhe në këtë drejtim ka rezultatet pozitive”, tha Gërguri.

Kurse Safet Gërxhaliu, kryetar i Odës Ekonomike të Kosovës, tha se një ndër sfidat me të cilat ballafaqohet komuniteti i biznesit, mbeten kamatat e larta bankare. Sipas tij, kamatat janë një problem, i cili dita-ditës është duke u alarmuar dhe i cili po pamundëson zhvillimin e bizneseve dhe ekonomisë në përgjithësi. “Nga këndvështrimi ekonomik vërtet është diçka që nuk është në funksion të zhvillimit ekonomik të Kosovës dhe nuk është në funksion të forcimit të sektorit privat, në veçanti atij prodhues. Nëse e shihni strukturën dhe kompanitë të cilat përfitojë më tepër nga bankat komerciale aktualisht në Kosovë, pothuajse se dominonte janë ato që merren me tregti”, tha Gërxhaliu, raporton Kosovapress.

Musa Limani, ekspert i ekonomisë, pohoi se Kosova për nga niveli i zhvillimit të forcave prodhuese, është ndër vendet që ka nivel më të ulët në rajon dhe hyn në radhën e vendeve jo mjaft të zhvilluara. “Për fat të keq, politika kreditore tek ne është më e ashpra në rajon, e që do të duhej të ishte e kundërta, në kuptimin se kushtet e dhënies së kredive, janë disfavorizuese për biznesin vendor, sepse jepen me norma shumë të larta të interesit, me një kthim shumë të shkurtë kohor, e ngarkon shumë biznesin vendor”, tha Limani. /Telegrafi/