KEK: SharrCem nuk ka pasur ndërprerje të rrymës
Korporata Energjetike e Kosovës ka reaguar ndaj deklaratave të zyrtarëve të fabrikës së çimentos “SharrCem”, të cilët akuzojnë për ndërprerje të furnizimit me energji elektrike në momentin kur mediat kanë qenë prezentë gjatë dy ditëve të kaluara dhe se kjo paska qenë arsyeja e pritjes se kamionëve.Sipas KEK-ut, këto akuza janë të pavërteta pasi që kompania ‘SharrCem’, nuk ka pasur ndërprerje të furnizimit me energji elektrike për asnjë moment gjatë periudhës në fjalë.
“Ky fakt është konfirmuar zyrtarisht në bazë të informatave që kemi pranuar nga KOSTT -i i cili furnizon ‘Sharr Cem’ nëpërmjet linjave të tensionit 110kv sikurse edhe nga informatat e marra nga vetë zyrtarët përgjegjës të ‘Sharr Cemit’. Për më tepër, për hir se vërtetës duhet të vihet në pah se kompania ‘SharrCem’ nuk ballafaqohet me ndërprerje të energjisë elektrike asnjëherë, meqë është konsumator i privilegjuar sipas kontratës së nënshkruar me KEK-un për furnizim të pandërprerë 24 orë”, thuhet në reagimin e KEK-ut.
“Prandaj, KEK-u shpreh habinë dhe indinjatën e thellë me këto deklarata të cilat pos që tentojnë të dëmtojnë imazhin ato njëherësh janë edhe fyese për KEK-un. Duke marr parasysh marrëdhëniet afatgjate kontraktuale që ka pas me SharrCemin, KEK-u pret nga zyrtarët e kësaj kompanie të japin sqarim dhe kërkojnë falje publike për këto deklarata, përndryshe është i detyruar të rishikoi pozicionin e tij në lidhje me dedikimin e deritanishëm të trajtimit të SharrCemit si një konsumator dhe partner preferencial”, thuhet në kumtesë. /Telegrafi/
