Klina shpenzoi 154 mijë euro për naftë
Vetëm në vitin 2011, komuna e Klinës ka shpenzuar 87.743 euro për karburante të veturave, që është shumë më shumë se komunat me numër të përafërt të banorëve. Ndërsa në nëntë muaj të këtij viti, janë shpenzuar dhe 66 504 euro. Edhe për mirëmbajtjen e automjeteve zyrtare, Klina shpenzon më shumë sesa për mirëmbajtjen e objekteve shkollore e shëndetësore.Raporti i publikuar nga Instituti për Studime të Avancuara (GAP), i quajtur “Letërnjoftimi i Klinës 2012”, nxjerr në pah keqpërdorime të shumta të parasë publike nën mandatin qeverisës të kryetarit aktual, Sokol Bashota, i cili erdhi në këtë post si rezultat i koalicionit PDK-LDK-LDD.
Raporti thekson se në këtë mandat komuna e Klinës është karakterizuar me keqpërdorime të shumta të parasë publike, shkelje të ligjeve në fuqi, mosrealizim të premtimeve zgjedhore, shkelje të procedurave të tenderimit, jotransparencë, largim të të punësuarve në baza partiake, punësime në baza familjare etj.
“Për dy vite radhazi, 2011 dhe 2012, komuna e Klinës shpenzon më shumë buxhet për mirëmbajtjen e automjeteve zyrtare, sesa për mirëmbajtjen e objekteve shkollore, shëndetësore dhe ato të banimit kolektiv. Në vitin 2011 janë shpenzuar 35 100 euro për mirëmbajte dhe riparim të veturave”, thuhet në raportin e publikuar të martën.
Ndërkaq vetëm në vitin 2011, komuna e Klinës ka shpenzuar 87.743 euro për karburante të veturave, që është shumë më shumë se komunat me numër të përafërt të banorëve, si Vitia, Lipjani apo Vushtrria.
Përderisa në nëntëmujorin e vitit 2012, kjo komunë ka shpenzuar 66 504 euro për karburante. Sipas GAP-it, trendi i këtyre e shpenzimeve nga viti në vit ka shkuar në rritje dhe se shpenzimet për këtë vit do të jenë më të mëdha se në vitin paraprak, raporton Gazeta JnK.
Kryetari i Komunës së Klinës, të cilit i kanë mbetur edhe rreth një vit deri në përfundim të mandatit, deri më tash sipas këtij raporti ka arritur të realizojë gjysmën e premtimeve të dhëna në fushatën zgjedhore në vitin 2009. /Telegrafi/
