Komision politik
Një prej organeve me të rëndësishme ekonomike në vend, Komisioni për Konkurrencë po përdoret nga partitë në pushtet për t’i rehatuar militantët e tyre. Ushtruesi aktual i detyrës së kryetarit të komisionit, Ahmet Krasniqi, është njeriu kryesor i PDK’së në Fushë Kosovë dhe vazhdon të jetë edhe anëtar i Asamblesë Komunale të këtij qyteti. Për shoqërinë civile këto janë ndërhyrje politike në institucionet e pavarura.
Instalimi i njerëzve politikë nëpër komisione dhe institucione të pavarura po zgjerohet vazhdimisht. Këtu, pas Qeverisë, po kontribuon edhe Kuvendi i Kosovës.
Ushtruesi aktual i detyrës së kryetarit të Komisionit për Konkurrencë, Ahmet Krasniqi, është njeriu kryesor i PDK’së në Fushë Kosovë dhe vazhdon të jetë edhe anëtar i Asamblesë Komunale të këtij qyteti. Krasniqi në këtë pozitë ka ardhur fillimisht si nënkryetar, kurse pas largimit të Osman Ejupit nga pozita e kryetarit të komisionit, ka kaluar si ushtrues detyre i kryetarit.
Ai në të njëjtën kohë mban edhe pozitën e këshilltarit komunal nga radhët e PDK’së në Fushë Kosovë. Me Ligjin për Konkurrencën, mbajtja edhe e pozitës së këshilltarit komunal nuk paraqet shkelje ligjore, por nga shoqëria civile thonë se ky komisioni është shumë i rëndësishëm për ekonominë e vendit dhe dërgimi aty i njerëzve të politikes e dëmton jashtëzakonisht shumë punën e tij.
Vetë kreu i Komisionit për Konkurrencë, Ahmet Krasniqi, ka konfirmuar për Express punën e tij të dytë si këshilltar komunal nga radhët e PDK’së në komunën e Fushë Kosovës. Ai ka thënë se me Ligjin për Konkurrencën mbajtja e kësaj pozite nuk paraqet shkelje ligjore. “Me Ligjin aktual për konkurrencën kjo nuk paraqet shkelje ligjore. Jam konsultuar me ligjin dhe me njerëz kompetentë kur e kam marr këtë detyrë”, ka thënë Krasniqi.
Drejtori Qendrës për Hulumtime Strategjike dhe Sociale - STRAS, Ibrahim Rexhepi, thotë se puna e këtij komisioni, fatkeqësisht, asnjëherë nuk është funksionalizuar mirë. Sipas Rexhepit, ky komision është prej institucioneve shumë të rëndësishme për tregun dhe ekonominë e vendit dhe duke i dërguar aty edhe njerëz politikë, atëherë dëmi është jashtëzakonisht i madh.
“Megjithëse nuk është funksionalizuar kurrë mirë dhe nuk është kompletuar ende, tash edhe ndërhyrjet politike dhe ky atëherë po që është një dëm i madh”, tha drejtori i STRAS’it, Rexhepi.
Me Ligjin për Konkurrencën, ky komision thuhet se është një organ i pavarur. Funksioni i tij është mbikëqyrja e konkurrencës në vend dhe ka të drejtën e marrjes së vendimeve të pavarura, si dhe të drejtën për masa të tjera të natyrës ndëshkimore për moszbatueshmërinë apo shkeljen e ligjit, në kuptimin e mbrojtjes së konkurrencës së lirë dhe efekteve në treg. /Express/Telegrafi/
