Korrje shirjet përfundojnë gati në të gjitha komunat
Fushata e korrje shirjeve të grurit ka përfunduar në të gjitha komunat e Kosovës, përveç në komunën e Dragashit, ku për shkak të lartësisë mbidetare dhe vegjetacionit të vonshëm, kjo fushatë fillon dhe përfundon gjithmonë me vonesë. Rendimenti mesatar, sipas raporteve përfundimtare që 20 drejtori bujqësore komunale të cilat i kanë dorëzuar në Ministrinë e Bujqësisë, Pylltarisë dhe Zhvillimit Rural, sillet në rreth 4000 kilogram për hektarë.Zyrtarët e Ministrisë së Bujqësisë thonë se me grumbullimit e të gjitha raporteve nga drejtorit komunale do të dalin me të dhëna më të dhëna përfundimtare.
Ndërkaq, lidhur me kontestimet e këtyre të dhënave nga opozita dhe Federata Sindikale e Bujqve të Kosovës, zëdhënësi Adil Behramaj tha se pohimet e pambështetura se Kosova nuk mund t’i plotësojë më shumë se 30-40 për qind të nevojave të brendshme konsumuese me prodhimtarinë e grurit, nuk janë asgjë tjetër përpos diletantizëm i theksuar i disa personave që opinionet e tyre nuk dinë t’i dallojnë nga argumentet dhe faktet. “Kjo gjë mund të nxirret lehtësisht në pah, me një përllogaritje të thjeshtë të vetëmjaftueshmërisë me prodhimin e brendshëm dhe mbulueshmërisë që sigurojmë nga importi, duke i krahasuar këto me nevojat e përgjithshme të konsumit vjetor”, deklaroi Behramaj.
Sipërfaqet e përgjithshme të mbjella me grurë në këtë vit, sipas të dhënave të komunave kanë qenë 83.875 hektarë, që shumëzuar me rendimentin mesatar prej 4000 kg për hektar, prodhimtaria e brendshme rezulton të jetë mbi 300 milionë kilogram grurë ose mbi 300 mijë ton. Ndërsa, nëse merren për bazë nevojat vjetore konsumuese për kokë banori, që janë 205 kilogram grurë, nevojat e përgjithshme që sillen në rreth 410 mijë ton dhe importi i përgjithshëm i grurit që për destinacion nuk e ka vetëm konsumin, i cili në vit sillet në rreth 130 milionë kilogram ose 130 mijë ton dhe nxirret përqindja e përmbushjes së nevojave me prodhimtarinë e brendshme të grurit, atëherë Kosova pritet se do t’i plotësojë rreth 75 për qind të nevojave të brendshme konsumuese. /Telegrafi/
