Kosova dhe Turqia shmangin tatimet e dyfishta

Ministri i financave i Kosovës, Bedri Hamza, vlerësoi se marrëveshja është shumë e rëndësishme dhe paralajmëroi marrëveshje tjera. “Nënshkruam edhe një marrëveshje tjetër për thellimin e bashkëpunimit tonë, marrëveshjen për eliminimin e tatimit të dyfishtë, që ka për qëllim tërheqjen e investitorëve dhe krijimin e kushteve të mira për bizneset e të dyja vendeve. Ne i kemi filluar negociatat edhe për një marrëveshje tjetër, që është marrëveshja për tregti të lirë”, tha Hamza.

Ministri Hamza ftoi investitorët turq të investojnë kapitalin e tyre në Kosovë, duke iu garantuar një trajtim të barabartë dhe të drejtë.

Kurse ministri i financave i Republikës së Turqisë, Mehmet Shimshek, tha se vizita e delegacionit turk në Kosovë, realizohet në një ditë të rëndësishme për shtetin e ri. Ai vlerësoi se rritja ekonomike, paqja dhe qëndrueshmëria e Kosovës, janë të rëndësishme për tërë rajonin dhe theksoi se marrëveshja për eliminimin e tatimeve të dyfishta do të ndikojë në rritjen e investimeve dhe të ekonomisë në përgjithësi.

“Ne i stimulojmë firmat dhe afaristët turq që të vijnë në Kosovë dhe Kosovën ta shohin si një djep të investimeve për Evropën. Në saje të reformave që janë bërë nga qeveria, Kosova është shndërruar në një qendër të tërheqjes së vëmendjes së investitorëve”, theksoi ai.

Marrëveshja pritet të fillojë të zbatohet më 1 janar të vitit 2013.

Ndërkohë, ministri Bedri Hamza theksoi se Kosova ende nuk e ka nivelin e dëshiruar të zhvillimit, sado që është arritur përparim i ndjeshëm.

Turqia radhitet ndër pesë vendet që Kosova ka më së shumti shkëmbime tregtare. /Telegrafi/