Kosova do të ketë zërin e vet në Bordin e Drejtorëve të BERZH-it

15:43 / 26.02.2013

Zëvendësministri i Financave Ramadan Avdiu ka pritur në takim një delegacion të Bankës Evropiane për Rindërtim dhe Zhvillim (BERZH), i cili kryesohej nga Eoin Ryan, drejtor ekzekutiv i Konstituencës së Irlandës dhe Danimarkës në BERZH.

Në këtë takim zëvendësministri Avdiu njoftoi delegacionin e BERZH-it për zhvillimet e fundit në fushën ekonomike dhe financiare. Ai shfrytëzoi rastin që ta falënderoj delegacionin si dhe qeveritë e tyre për përkrahjen që i kanë dhënë Kosovës në procesin e anëtarësimit në BERZH.

“Është inkurajues fakti se menjëherë pas anëtarësimit, janë intensifikuar vizitat e Misioneve të BERZH -it në Kosovë, dhe kjo është në funksion të rritjes së bashkëpunimit dhe eksplorimit të mundësive investuese në Kosovë. Presim që sektori privat të jetë udhëheqës i rritjes ekonomike dhe në këtë kontekst, presim që investimet e BERZH-it në të ardhmen të jenë të orientuara më shumë në sektorin privat dhe në ndryshimet strukturore që janë duke ndodhur”, tha Avdiu.

“Ne po ashtu presim investime të konsiderueshme në sektorin e energjisë, minierave, telekomunikacionit e në sektorë të tjerë gjithashtu edhe përmes pjesëmarrjes nga jashtë, dhe në këtë rast e shohim BERZH-in si një mundësi për burime shtesë të financimit”.

Ndërsa, në anën tjetër drejtori ekzekutiv i Konstituencës së Irlandës dhe Danimarkës Eoin Ryan, konsituencë e cila përfaqëson edhe Kosovën në Bordin Ekzekutiv të BERZH-it, u shpreh që Kosova do ta ketë mbështetjen e vazhdueshme gjatë hartimit të strategjisë dhe do të ketë zërin e vet në Bordin e Drejtorëve të BERZH-it. Me këtë rast delegacioni i Kosovës u ftua që të marr pjesë në takimin vjetor të BERZH-it që mbahet në maj të këtij viti në Stamboll. /Telegrafi/

 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.