Kosova treg interesant për investitorët italian
Kryetari i Aleancës Kosovare të Bizneseve Agim Shahini, ka pritur një delegacion të bizneseve nga Italia të udhëhequr nga Evans Capuani, shef i grupit të investitorëve italian. Në këtë takim u diskuar rreth mundësisë së investimeve italiane në Kosovë dhe bashkëpunimit të bizneseve italiane me AKB-në dhe bizneset e Kosovës.Shahini, njoftoi grupin e investitorëve nga Italia rreth mjedisit për bërit biznes në Kosovë, duke i ofruar bashkëpunim në të gjitha fushat në mënyrë që investitorët italian të kenë më lehtë arritjen e qëllimeve të tyre. “Investitorët italian gjithnjë kanë qenë dhe janë të pranishëm në Kosovë. Shteti jonë ka politika shumë të favorshme për investime. Nga të gjitha shtetet e Bashkimit Evropian, ndër partnerët më të fuqishëm është Italia, me të cilin kemi edhe më shumë eksporte”, tha ai.
Kryetari i AKB-së, tregoi se tregu i Kosovës është liberal dhe nuk ka kufizime të prodhimeve. Kosova për bërje të biznesit ka shënuar përmirësime ku në raportin e Bankës Botërore, është renditur mbi 70 vende më lartë në krahasim me të kaluarën dhe situata po ndryshon për të mirë.
Nga ana tjetër Evans Capuani, udhëheqës i grupit të investitorëve nga Italia, tha se ka një kohë që shumë biznese serioze italiane kanë ardhur në Kosovë dhe kanë vizituar tërë territorin. “Këto biznese të fuqishme kanë vendosur të investojnë në Kosovë në fusha të ndryshme. Këtu gjatë vizitave që i kemi bërë gjithë vendit, mjedisi dhe njerëzit na kanë pëlqyer dhe kjo do të thotë se e njohim shumë mirë këtë vend dhe historinë e saj”, tha biznesmeni Capuani. /Telegrafi/
