Kryeministri Thaçi takoi përfaqësuesit e BERZH-it

16:15 / 26.02.2013

Kryeministri i Republikës së Kosovës, Hashim Thaçi pati një takim njoftues me drejtorin ekzekutiv të Irlandës në BERZH, Eoin Ryan, zëvendës drejtorin e Danimarkës në BERZH, Ole Blondal, dhe këshilltarin e presidentit të BERZH-it, Oleg Levitin, të cilët do të jenë përfaqësues për Republikën e Kosovës në Bankën Evropiane për Rindërtim dhe Zhvillim (BERZH).

Në takim kryeministri Thaçi edhe njëherë vlerësoi lartë vendimin e Bordit të Guvernatorëve për anëtarësimin e Republikës së Kosovës në këtë institucion dhe u shpreh mirënjohës për ndihmën e Bankës Evropiane për Rindërtim dhe Zhvillim gjatë këtij procesi. Po ashtu, kryeministri Thaçi i falënderoi përfaqësuesit e BERZH-it për përkrahjen dhe përkushtimin e tyre të deritashme në sektorin privat.

Në takim diskutuan mbi Strategjinë për Kosovën të BERZH-it dhe u pajtuan se orientimet strategjike që dalin nga kjo strategji janë në përputhje me prioritetet strategjike të Qeverisë së Republikës së Kosovës. Gjatë takimit, kryeministri Thaçi ngriti idenë për mundësinë e përkrahjes nga BERZH të projekteve ndërqeveritare të infrastrukturës rrugore. Në kuadër të kësaj, kryeministri Thaçi kërkoi që të shihen modalitetet për përkrahjen e rrugës që do të lidh Republikën e Kosovës me atë të Serbisë, ide kjo e cila është diskutuar edhe në kuadër të dialogut dhe ka gjetur përkrahjen e Qeverisë së Serbisë dhe të Bashkimit Evropian

Kryeministri Thaçi kërkoi të shihen mundësitë për financimin e rrugës R6 e cila lidhë Prishtinën me Shkupin, si dhe për mundësinë e një rruge lidhëse mes vendit tonë dhe Malit të Zi. Gjithashtu, kryeministri Thaçi diskutoi edhe mundësinë për shtrimin e rrugës që do të lidhte Prizrenin me Tetovën përmes Maleve të Sharrit.

Përfaqësuesit për Republikën e Kosovës në BERZH e informuan kryeministrin Thaçi se do të përfaqësojnë interesat e Republikës së Kosovën pranë BERZH-it në mënyrën më të mirë të mundshme. Po ashtu, ata e siguruan kryeministrin Thaçi se projekt idetë për infrastrukturën rrugore do t’i ngritin në mbledhje të bordit, në mënyrë që të shihen modalitetet për përkrahjen e tyre nga BERZH-i. /Telegrafi/

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.