Kuvendi nuk e ndaloi procesin e privatizimit
Kuvendi i Kosovës me 45 vota për, 53 kundër dhe 9 abstenime nuk e miratoi Mocionin për procesin e privatizimit në Kosovë, të propozuar nga grupi parlamentar i Vetëvendosjes në harmonizim me atë të Lidhjes Demokratike të Kosovës (LDK) dhe Aleancës për Ardhmërinë e Kosovës (AAK), me ç’rast kërkohej të ndalej procesi i privatizimit në Kosovë.Lëvizja Vetëvendosje përmes këtij mocioni ka kërkuar ndaljen e procesit të privatizimit.
Ndërkaq, Partia Demokratike e Kosovës ka dalë me një Rezolutë për vazhdimin e procesit të privatizimi e cila nuk është hedhur në votim për shkak të mos kalimi të mocionit të Vetëvendosjes.
Para hedhjes në votim të Mocionit të VV-së është debatuar për procedurat dhe rregulloren për propozimin e mocionit dhe rezolutës.
Shefi i Grupit parlamentar të Vetëvendosjes, Visar Imeri, ka kërkuar që të votohet vetëm mocioni i cili është paraqitur nga ata.
Sipas tij, mocioni për ndaljen e procesit të privatizimit është përafruar edhe me qëndrimet e deputetëve nga LDK-ja dhe AAK-ja.
Por, shefi i Grupit parlamentar të PDK-së, Adem Grabovci tha se janë dy dokumente dhe cili prej dokumenteve kalon në Kuvend është legjitim.
Ndryshe, debati për procesin e privatizimi gjatë seancës së kaluar ka ngjallur debat të ashpër në Kuvend. Po ashtu gjatë asaj seance janë përplasur ashpër kryetari i Kuvendit, Jakup Krasniqi dhe shefi i deputetëve të PDK-së në Kuvend, Adem Grabovci. /Telegrafi/
