Maqedoni, diaspora për gjashtë muaj 700 milionë euro
Në Maqedoni për gjashtë muajt e ardhshëm të këtij viti kanë hyrë mbi 700 milionë euro nga diaspora. Këto mjete kryesisht vijnë në vend për investime dhe për nevojat e familjeve. Këto mjete ndikojnë dhe marrin pjesë me 5 për qind në Bruto Prodhimin e Përgjithshëm Vendor. Por, kjo shumë konsiderohet shumë më e vogël për dallim nga vendet e tjera të rajonit. Studimi lidhur me paratë e diasporës në vendet e Ballkanit është bërë nga agjencia turke e lajmeve Anadollia. Sipas kësaj agjencie, këto mjete ndikojnë tej mase në buxhetet shtetërore të këtyre vendeve në Evropën Juglindore.
Sipas të dhënave të Bankës Botërore, diaspora më shumë mjete derdh në Bosnjë, më pas vjen Serbia. Diaspora në këto vende merr pjesë me 13 për qind në BPV.
Diaspora shqiptare radhitet në vendin e tretë me 11 për qind të BPV. Ndërsa Maqedonia radhitet në fund, ndërsa mediat vendore shqiptare vazhdimisht nxisin debate që diaspora shqiptare është ajo që sjellë paratë dhe kontribuon në buxhetin e Maqedonisë. Në vitin 2010 në Serbi kanë hyrë 5.6 miliardë dollarë nga diaspora, në Shqipëri 1.3 miliardë dollarë, në Kroaci 1.6 miliardë dollarë dhe Bosnjë Hercegovinë 2.2 miliardë dollarë. /Telegrafi/
