Ministri Hamza takoi udhëheqësit e projekteve të Bankës Botërore
Në Ministrinë e Financave u organizua një takim me të gjithë udhëheqësit e projekteve që implementohen nga Banka Botërore në Kosovë. Qëllimi i këtij takimi ishte koordinimi i aktiviteteve në mes projekteve, rritja e efektivitetit të tyre me qëllim të implementimit sa më të suksesshëm të këtyre projekteve, ku me këtë rast u prezantua edhe instrumenti për menaxhim tremujor të portofolit për projektet e financuara nga Banka Botërore.
Ministri i Financave Bedri Hamza duke falënderuar Bankën Botërore për asistencën që është duke i ofruar Kosovës që nga përfundimi i luftës e në vazhdimësi, foli edhe për rëndësinë që këto projekte kanë për zhvillimin e vendit. “Qeveria e Republikës së Kosovës është shumë e interesuar që të gjitha projektet të kenë një implementim të suksesshëm dhe në këtë drejtim brenda institucioneve do të bëjmë përpjekjet tona që të punohet maksimalisht me qëllim të realizimit të objektivave të parapara. Ministria e Financave në këtë drejtim do të ofrojë gjithë mbështetjen e nevojshme që të tejkalohen pengesat eventuale që paraqiten në punë”, tha ministri Hamza.
Ndërsa, menaxheri i Zyrës së Bankës Botërore në Kosovë, Jan-Peter Olters, duke e vlerësuar rëndësinë e takimit, theksoi se kjo formë e punës është mënyrë shumë e mirë e bashkërenditjes dhe koordinimit të punëve në mes të Bankës Botërore dhe Qeverisë në të gjitha aspektet.
Takimet e tilla tash e tutje do të jenë të rregullta dhe do të mbahen një herë në tre muaj. /Telegrafi/
