Mitrovicë, kompanitë ndërtimor mbi një milion euro borxh komunës
Tatimet paraqesin problemin kryesor për Komunën e Mitrovicës, e cila nuk po arrin t’i mbledhë ato nga disa kompani ndërtimore, pasi një numër i konsideruar i tyre tani veç kanë falimentuar. Kompanitë e ndërtimit, si dhe personat privat që kanë ndërtuar ndërtesa shumëkatëshe, i kanë borxh komunës së Mitrovicës rreth 1.1 milion euro, thonë zyrtarët komunalë. Sipas tyre, ata kohë pas kohe janë takuar me përfaqësues të këtyre kompanive, ku kanë shqyrtuar mundësinë e likuidimit të borxhit të tyre.
Mehdi Bala, drejtor i Drejtorisë për Urbanizëm në Mitrovicë, tha për Kosovapress se këto takime nuk kanë dhënë rezultatet e pritura, pasi që vetëm një pjesë shumë e vogël e këtyre kompanive kanë kryer detyrimet ndaj shtetit. “Ne jemi të vendosur që jo vetëm kompanitë e ndërtimit, por edhe bizneset tjera të cilat kanë borxhe ndaj shtetit, t’i shlyejnë ato sa më parë”, theksoi Bala.
Sipas tij, borxhlinjtë më të mëdhenj të komunës sa i përket tatimit janë kompanitë e ndërtimit, borxhi i së cilave arrin vlerën rreth 1.1 milion euro. /Telegrafi/
