Mrekullia kosovare në Bursën e Londrës
Për më se dy javë Kosova ka përjetuar një ndryshim imazhi në shtypin anglez dhe botëror. Vendi i mbytur me raporte korrupsioni e krimi, po e fut një kompani të saj në Bursën e Londrës (AIM). Një kompani që do të punojë në Kosovë me mermerin e saj, Fox Marble është pranuar që të tregtojë në Berzë, e para jo vetëm nga vendi, por edhe nga rajoni.Pranimi i “Fox Marble” në Bursën e Londrës u përcoll me shkrime të shumta nga mediumet botërore si: Financial Times, The Daily Express, London Evening Standard, The Business Desk etj. “Mermeri i Kosovës është më i shtrenjtë sesa që mund të vlerësoni. Mermeri i zi është shumë i kërkuar në SHBA”, shprehej ditë më parë për mediet e huaja Christopher Gilbert, kryeshef ekzekutiv i kompanisë, duke shtuar se këto gurore të mermerit vlerësohet se kanë rezerva prej rreth 300 milionë metra kub mermer.
Gilbert është një biznesmen i njohur, i cili ka ngritur dhe shitur shumë kompani nëpër botë në sektorë të ndryshëm, e sidomos në sektorin e muzikës me kompani të incizimeve.
Pjesë e kësaj kompanie është edhe ish-ylli i emisionit televiziv të BBC-së “Dragon’s Den”, James Caan, përmes kompanisë së tij “Hamilton Bradshaw Capital Partners”.
Lidhur me fillimin e tregtimit të aksioneve në AIM, Gilbert ka thënë se ky është një hap i madh në zhvillimin e “Fox Marble”. “Unë do të doja t’i mirëpres të gjithë aksionarët tanë të rinj dhe të shohim se Fox Marble bën përparim të shpejtë drejt prodhimit dhe përpunimin e mermerit cilësisë më të lartë", ka potencuar ai.
Fox Marble është një Holding Kompani angleze, të cilës i është dhënë licenca minerare për pesë gurore të mermerit të mbuluara me një sipërfaqe prej rreth 239.000 metra katrorë në Kosovë, përkatësisht në rajonin e Pejës, Rahovecit etj.
Drejtuesit e kompanisë planifikojnë të fillojnë operacionet fillimisht në dy guroret e grupit, për të ndërtuar një fabrikë të përpunimit të mermerit dhe të zhvillojnë rrjetin e shitjes së mermerit, ndërsa dy gurore tjera planifikohet të hapen në gjysmën e parë të vitit 2014. “Grupi synon të shesë një sasi të kufizuar të blloqeve mermerit të papërpunuara për të gjeneruar rrjedhje të hershme të parasë, ndërsa ndërtimi i fabrikës për përpunimin e mermerit parashihet të zgjasë 10 muaj. Grupi do të përqendrohet kryesisht në shitjen e pllakave të mermeri të lëmuar, të cilët do të kenë destinim industrinë e ndërtimit dhe atë dekorative në të gjithë botën”, bëhet e ditur nga drejtuesit e “Fox Marble”. /Zëri/Telegrafi/
