MTI nuk ka para për tenderin e Brezovicës
Ministria e Tregtisë dhe e Industrisë nuk ka mjete të mjaftueshme financiare për zhvillimin e kompleksit të turizmit në Brezovicë. Projekti i propozuar edhe nga Komisioni Evropian tani ka ngecur, meqë në arkën e Ministrisë së Tregtisë nuk ka mjete të mjaftueshme për të paguar shërbimet këshilluese ligjore dhe ato të transaksionit për zhvillimin e projektit të Brezovicës. Tenderi i hapur më 3 maj të këtij viti, është anuluar të martën. “Tenderi për Këshilltarin e Transaksionit/Ligjor për zhvillimin e projektit të Brezovicës është proceduar më tutje dhe janë pranuar shtatë oferta, mirëpo vlerësimi i ofertave ka rezultuar që tenderi i përgjegjshëm përmban çmimin i cili në masë substanciale e tejkalon buxhetin e autoritetit kontraktues për aktivitetin e prokurimit dhe për këtë MTI-ja është detyruar të anulojë atë”, ka thënë për “Koha Ditore” Arta Istrefi, këshilltare për media e ministres Mimoza Kusari-Lila.
Sipas saj, ministria beson se do të ketë investime milionëshe në zhvillimin e turizmit dimëror në këtë vend.
Sipas vendimit të Qeverisë, gjithçka që është në këtë zonë, përfshirë pronën e paluajtshme, objektet hoteliere të ndërmarrjes shoqërore “Inex” dhe ato private, nëse është nevoja, do t’u jepen investuesve të ardhshëm në kuadër të projektit për zhvillimin e këtij kompleksi. Njëherësh, kjo është parë si mënyra më e mirë që të funksionalizohet qendra ekzistuese e skive pa dhënë para nga buxheti, krahas asaj që e ka propozuar Komisioni Evropian. /Telegrafi/
