Mujota: Në fund të vitit kontrata për autostradën Prishtinë – Hani i Elezit
Ministri i Infrastrukturës ( MI), Fehmi Mujota, ka vizituar Lipjanin të martën për të inspektuar disa projektesh rrugore, ka premtuar kontratë këtë fundvit për nisjen e punimeve në autostradën Prishtinë – Hani i Elezit. Ministri Fehmi Mujota tha se e ka njoftuar edhe kryetarin Buja për projektin madhor nacional, për autostradën 6, përkatësisht për rrugën Prishtinë – Hani i Elezit, e që përshkon territor bukur të gjerë të komunës së Lipjanit.
Ai ka treguar se janë në procedura të rregullta të parakualifikimit për zgjedhjen e këshilltarit të transaksionit dhe është hapur shprehja e interesit.
“Ne presim që deri në fundvit, nëse të gjitha procedurat shkojnë si duhet të vijmë deri te përfundimi i të gjitha obligimeve tona si Ministri, për përgatitjen teknike dhe krijimin e kushteve të volitshme buxhetore, e më pas edhe do të nënshkruhet kontrata për këtë rrugë”, theksoi Mujota. /Telegrafi/
