Ndërmarrjet e vogla zhvillojnë ekonominë

Zëvendëskryeministrja dhe ministrja e Tregtisë dhe Industrisë, Mimoza Kusari – Lila, në fjalën e saj hapëse tha se ky projekt ka për qëllim përmirësimin e sfidave të evidentuara me të cilat po ballafaqohet sektori privat siç janë qasja në financa dhe qasja në shërbime profesionale këshillimore. “Kjo është mbështetje e drejtpërdrejtë e bizneseve” – theksoi ajo. Më tutje, ministrja Kusari – Lila tha se ngritja e kapaciteteve të ndërmarrjeve të vogla dhe të mesme, e cila do të realizohet përmes këtij projekti, është tejet e rëndësishme.

Ndërsa ChristianGeosits Drejtor i Zyrës së ADA-së në Kosovë, tregoi komponentët kryesor të projektit si dhe tregoi se një nga arsyet kryesore që ADA ka përkrahur këtë projekt është rëndësia e NVM-ve për ekonominë e Kosovës, kurse Christopg Lang Drejtor i SDC-së tha se Kosova ka potencial për zhvillim dhe forcim të NVM-ve dhe se ky projekt ka për qëllim zhvillimin e qëndrueshëm dhe konkurrent të NVM-ve.

Programi për promovimin e Ndërmarrjeve të Vogla dhe të Mesme në Kosovë ka për qëllim promovimin e zhvillimit të sektorit privat dhe mbështetja e konkurrueshmërisë së ndërmarrjeve të vogla dhe të mesme, bazuar në principet e zhvillimit të qëndrueshëm. Gjatë periudhës tre vjeçare, sa do të zgjasë ky projekt, do të realizohen 3 objektivat kryesore: asistimi në përforcimin e përkrahjes sëNVM-ve, me theks të veçantë zhvillimin e hulumtimeve për NVM-të, ngritjen e dialogut publiko-privat dhe implementimin e strategjisë së NVM-ve. Qëllimi i dytë është ofrimi i këshillave dhe trajnimeve për bizneset fillestare si dhe atyre ekzistuese. Direktiva e tretë që ky projekt do ta implementoj është Skema e Garantimit të Kredive, që ka për qëllim përmirësimin e bizneseve vendore në qasjen në financa.

Projekti “Programi për Promovimin e NVM-ve” do të përfundoj më 15 tetor 2015. /Telegrafi/