Në vjeshtë reformohet sistemi doganor
Nga vjeshta e këtij viti më së largu deri në fillim të vitit të ardhshëm pritet të vihet në funksion një sistem i ri doganimi i cili do të ndikoj ne performancen e doganave por edhe në lehtësimin e aktiviteteve biznesore për kompanitë vendore ku do të ndikohet drejtpërdrejt në rritjen e të hyrave buxhetore. Por që te arrihet një efektivitet e tillë ka nevojë për një mbështetje dhe partneritet në mes ndërmarrjeve afariste dhe doganave të Kosovës.
Kështu është thënë gjatë një takimi që Doganat e Kosovës kanë zhvilluar me përfaqësues të komunitetit të biznesit të kryesuar nga Kryetari i Odes Ekonomike të Kosovës Safet Gërxhaliu.
Gërxhaliu tha se një takim si me doganat duhet të jetë një model se si përmes këtij bashkëpunimi të jetë në funksion të zhvillimit ekonomik të Kosovës. “Vetë fakti që jeni shtylla kryesore e grumbullimit te buxhetit të shtetit është dëshmia me e mirë se sa e nevojshme është mbështetja nga biznesi dhe komuniteti në përgjithësi. Ndërsa jemi të vetëdijshëm edhe për sfidat me të cilat ballafaqohen doganat e Kosovës, dhe i vlerësojmë shumë sukseset e deritashme të arritura si në rrafshin vendor po ashtu edhe ndërkombëtar të Doganave të Kosovës”, tha Gërxhaliu.
Drejtori i Doganave Naim Huruglica tha se pikësynim kryesor do të jetë lehtësimi i procedurave të doganimit paralelisht me eliminimin e të gjitha mangësive që mund të shfaqen. “Në këtë drejtim Doganat e Kosovës kanë nevojë për një partneritet me kompanitë afariste të Kosovës, nga të cilat përmbushet pjesa më e madhe e buxhetit”, tha Huruglica.
Sipas tij, Doganat kanë nevojë për një bashkëpunim me kompanitë e biznesit për të arritur sukseset e dëshiruara.
Ai paralajmëroi se Dogana e Kosovës pritet në vijim të nënshkruajnë marrëveshje edhe me 24 vende për shkëmbime informative lidhur me eksportet dhe importet e mallrave. “Me sistemin e ri dëshirojmë të ulim kontrollin më të ulët në dhjetë për qind. Ne dëshirojmë të kalojmë në sistemin e kreditimit të biznesit”, ka thënë ai. Gjatë gjashtë mujorit të parë shuma e mallrave në depot doganore është 57 milionë euro më shumë se vitin e kaluar. Ndërsa deri në fund të vitit ti afrohen 800 milionë euro. /Telegrafi/
