Për 13 kilometra të Autostradës Prishtinë-Shkup në opsion edhe ridizajnimi

Qeveria e Kosovës në bashkëpunim me Bankën Botërore pritet të finalizojnë studimin e fizibilitetit në fillim të vitit 2013, si parakusht për të filluar implementimin e projektit të saj. Këto të dhëna janë paraqitur nga ministri i Financave, Bedri Hamza, në një konferencë të përbashkët me udhëheqësin e misionit të Fondit Monetar Ndërkombëtar (FMN-së) për Kosovë, Johannes Wiegand.

Ai ka thënë se 40 kilometrat e parë të kësaj autostrade janë ekonomikisht të favorshme. “Kurse për pjesën jugore të saj në Kaçanik, që janë rreth 13 kilometra, janë duke u marrë për bazë të gjitha opsionet - siç është edhe ridizajnimi i saj”, ka thënë ai.

Ai ka thënë se Kosova duhet të ketë 300 milionë euro në bilancin bankar, si kusht për të nisur ndërtimin e kësaj autostrade. “Të gjitha këto për të filluar ky projekt, që është i kushtueshëm dhe normalisht është një presion në buxhetin e Kosovës, ne jemi dakorduar që duhet të kemi një nivel të kënaqshëm të bilancit bankar dhe jemi pajtuar që në momentin e startimit të ndërtimit të këtij projekti niveli i bilancit bankar të jetë 300 milionë euro. Për këtë jemi dakorduar edhe me FMN”, ka thënë ai,s hkruan Koha Ditore.

Në bilancin bankar në fund të vitit 2012 pritet të jenë rreth 200 milionë euro. Pra, Kosova do të duhej që në bilancin bankar të depononte edhe mjetet nga privatizimi, në mënyrë që të arrihet kushti që në bilancin bankar të jenë 300 milionë euro para se të nisë ndërtimi i autostradës për në Shkup. /Telegrafi/