Përfundon Panairi i Produkteve Bujqësore
Ka përfunduar Panairi i Produkteve Bujqësore, në të cilin për tri ditë radhazi prodhuesit nga Kosova, por edhe rajoni ekspozuan prodhimet e veta, para konsumatorëve kosovarë. Ky panair i cili u organizua nga Ministria e Bujqësisë, Pylltarisë dhe Zhvillimit Rural dhe Oda Ekonomike e Kosovës, nga të pranishmit u vlerësua i mjaftë pozitiv, pasi që konsumatori për së afërmi ka pasur rastin të njoftohet me kualitetin e prodhimeve vendore.Në këtë panair, produktet e tyre bujqësore i kanë ekspozuar mbi 60 agrobiznese, duke përfshirë edhe katër agrobiznese nga Shqipëria, një nga Greqia dhe dy të tjera nga veriu i Kosovës, përkatësisht nga komuna e Zubin Potokut dhe Zveçanit.
Ministri i Bujqësisë, Blerand Stavilevci, ka thënë se panairet e tilla kanë një rëndësi të veçantë, pasi që shërbejnë për të krijuar ura mes prodhuesit dhe konsumatorit.
“Duhet krijuar ura më të mira dhe më të sigurta që prodhuesit tanë të lidhen me konsumatorët. Nëse ne kemi prodhime të mira dhe cilësore, që një gjë të tillë edhe e kemi atëherë nuk mjafton që për ato vetëm deklarativisht të flasim për cilësinë e tyre por duhet t’i ekspozohen konsumatorit që konsumatori të ketë mundësi t’i sheh ato, t’i provojë ato, t’i shijojë ato dhe në këtë mënyrë mbi bazën e cilësisë së tyre të krijojë një varësi psikologjike për këto produkte”, ka thënë Stavileci. /Telegrafi/
