Porti i harruar
Porti i Shëngjinit vështirë se do të bëhet ndonjëherë zyrtarisht pronë e Kosovës, ashtu si pati premtuar Kryeministri i Shqipërisë, Sali Berisha. Për këtë projekt ende nuk është bërë asgjë konkrete sa i përket bartjes së pronësisë dhe investimeve nga të dyja palët. E derisa Kosova duket se e ka harruar Shëngjinin, Qeveria shqiptare ka filluar të investojë vetë në modernizimin e këtij porti jo vetëm për mallra, por edhe për jahte të turistëve.Porti i Shëngjinit mbetet vetëm një ëndërr e bukur për kosovarët. Dalja e premtuar në det nga kryeministri i Shqipërisë, Sali Berisha, për “vëllezërit” nga Kosova, ka gati pesë që vjet ka mbetur e bllokuar.
Madje, porti në të cilin Qeveria e Kosovës premtonte se do të vinte doganën e vet dhe do të mblidhte taksat nga transporti detar, as nuk është në agjendë të funksionalizohet.
Gjithçka rreth faljes së portit të Shëngjinit ka mbetur në nivel fjalësh dhe me gjasë kështu do të mbetet përgjithmonë, shkruan Express.
Në Ministrinë e Infrastrukturës e pranojnë se për këtë projekt nuk po bëhet asgjë konkrete. “Përveç gatishmërisë së shprehur nga Qeveria shqiptare për ofrimin e portit të Shëngjinit Republikës së Kosovës dhe interesit të shprehur nga ana e Qeverisë së Kosovës për këtë mundësi të ofruar, nuk ka një akt të shkruar, nuk ka një marrëveshje, apo bartje pronësie, ndonëse në takime zyrtare është diskutuar si mundësi e realizimit të saj”, tregon Lah Nitaj, këshilltar për medie në Ministrinë e Infrastrukturës. /Telegrafi/
