Preferencat politike për guvernatorin e BQK-së

Megjithëkëtë, kryetarja e këtij komisioni, Safete Hadergjonaj është shprehur e befasuar se në këtë rast nuk ka pasur ndonjë ndikim nga jashtë, i cili do të ndikonte në punën e komisionit. “Si në mandatin tjetër edhe këtë mandat kemi pasur interferime të ndryshme rreth bordeve, rreth personave të caktuar, sidomos kur ka qenë çështja te BQK-ja. Jam shumë e kënaqur që askush nuk ka interferuar për asnjë anëtar, as nga ndërkombëtarët dhe as nga vendorët, kështu që jemi të lirë në përzgjedhje”, ka thënë Hadërgjonaj.

Mirëpo, anëtari i këtij komisioni, Latif Gashi nga PDK-ja, ka insistuar që komisioni të rekomandojë Bedri Pecin për këtë pozitë, me arsyetimin se komisioni vlerësues i BQK-së e ka vlerësuar me 10 pikë më shumë. “Që t’i ikim votës politike dhe duke marr aspektin profesional, kërkoj që t’i japim përkrahje kandidatit që është vlerësuar më së shumti me vota”, ka thënë Gashi.

Mirëpo, deputetët e LDK-së, njëherësh anëtarë të këtij komisioni, janë shprehur kundër këtij rekomandimi edhe pse kanë pranuar që në Kuvend kandidatët votohen politikisht e jo profesionalisht. “Ka me qenë votë politike në Parlament. Nuk ka nevojë që ne të japim sugjerime që ndoshta grupet tona parlamentare do të propozojnë dikënd tjetër për ta votuar, kështu që të shkojnë të gjithë dhe atje vendoset”, ka thënë deputeti i LDK-së, Sali Asllanaj. “Ne e dimë qysh funksionon, asnjë deputet nuk do ta ketë parasysh këtë rekomandimin për persona të veçantë”, ka thënë Hykmete Bajrami, po ashtu nga LDK-ja.

Ndërsa kryetarja Hadërgjonaj, edhe pse propozoi që të favorizohet Bedri Peci, në fund rekomandoi që të tre emrat të shkojnë në Kuvend për votim. “Ne jemi dëshmitarë të një realiteti që në njëfarë mënyre po depërtojnë njerëz edhe pa përvojën profesionale, mirëpo BQK-ja është i vetmi institucion që nuk duhet të kërkohet përvoja politike. Nganjëherë edhe me lobime që bëhen mund të përfitojë një kandidat, që ndoshta nuk ia vlen fare të jetë aty”, ka thënë Hadërgjonaj.

Në këtë mbledhje është proceduar për në Kuvend edhe Projektligjit për tarifat e veçanta të akcizës për prodhimin fillestar dhe prodhimin e vogël të produkteve alkoolike të prodhuara në Kosovë. Ramadan Avdiu, ushtrues detyre i ministrit të Financave, duke folur për këtë projektligj ka thënë se synojnë t’i ndihmojnë të gjithë prodhuesit vendorë pasi këto masa, sipas tij, janë kryesisht masa mbështetëse për të filluar prodhimin fillestar. “Nëpërmjet këtij projektligji Ministria e Financave synon ta rregullojë ambientin biznesor të kësaj veprimtarie si dhe nxitjen dhe stimulimin e prodhimtarisë vendore dhe mundësisë që prodhuesit vendorë të konkurrojnë me produktet e tyre në tregun e Kosovës dhe jashtë saj”, ka thënë Avdiu. /Zëri/Telegrafi/