Pretendentët mbajnë peng 75 për qind të Fondit të privatizimit
Fondi i privatizimit që tanimë kap vlerën prej 560 milionë eurove e që gjenden në mirëbesim, mbahet peng nga pretendentët në masën prej 75 për qind. Ndonëse është përshpejtuar procesi i likuidimit të ndërmarrjeve të privatizuara, Agjencia Kosovare e Privatizimit është e obliguar që në bazë të ligjit të lërë të pashpenzuara 75 për qind të mjeteve të përfituara nga shitja e aseteve deri në vërtetimin e kompanisë likuiduese.Këto mjete, që sipas zyrtarëve të Agjencisë Kosovare të Privatizimit janë të ruajtura në Bankën Qendrore, mund të shfrytëzohen vetëm atëherë kur merret vendimi se pretendentët nuk kanë hise në to, shkruan Koha.
“Mjetet e mbledhura nga procesi i privatizimit agjencia i mban në mirëbesim në depozituara në Bankën Qendrore të Kosovës, me vendim të Bordit të drejtorëve dhe pas shpërndarjes së mjeteve të një ndërmarrjeje, 20 për qind për punëtorët, 5 për qind shpenzime operative të AKP-së, sipas ligjit dhe 75 për qind për kreditorët e mundshëm të ndërmarrjeve, sipas Ligjit të AKP-së, mjetet e mbetura barten në Buxhetin e Kosovës”, tha Ylli Kaloshi, zëdhënës i Agjencisë Kosovare të Privatizimit. /Telegrafi/
