Qeveria s’di çfarë të bëjë me 560 milionë euro të privatizimit

Përfaqësuesit e institucioneve qeveritare e kanë larguar përgjegjësinë nga vetja për mënyrën e menaxhimit të këtij fondi.

Zëdhënësi i Agjencisë Kosovare të Privatizimit, Ylli Kaloshi, ka theksuar se në fondet e mirëbesimit aktualisht janë rreth 560 milionë euro, duke përjashtuar shumën prej 29 milionë eurove që janë bartur në buxhetin e Kosovës nga procesi i likuidimit të 65 ndërmarrjeve shoqërore, si dhe mbi 60 milionë eurove të 20-përqindëshit të shpërndara të punëtorëve pas shitjes së ndërmarrjeve shoqërore. “Me vendim të Bordit të drejtorëve dhe pas shpërndarjes së mjeteve të një ndërmarrjeje 20-përqindëshit për punëtorët dhe 80-përqindëshit për kreditorët e mundshëm të ndërmarrjeve, sipas Ligjit të AKP-së, mjetet e mbetura barten në Buxhetin e Republikës së Kosovës”, ka thënë Kaloshi.

Por asnjëri nga përfaqësuesit e institucioneve nuk e kanë bërë të ditur përqindjen apo vlerën e shpenzimit vjetor të këtyre mjeteve që kapin vlerën e gjysmës së buxhetit vjetor të Kosovës, shkruan Koha Ditore.

Derisa mjetet gjenden në procedurë, sipas Ligjit të AKP-së, është vetë agjencia ajo që vendos për fondet që janë nën juridiksionin e saj në mirëbesim për dobi të kreditorëve dhe pronarëve përkatës.

Nga AKP-ja është bërë e ditur se një pjesë e fondit të privatizimit do të shfrytëzohet për blerjen e letrave me vlerë të Qeverisë, nëpërmjet Bankës Qendrore. Ndërkohë, pjesa e tjetër e mbetur do të derdhet në buxhet. Në bazë të marrëveshjes së fundit të lidhur ndërmjet FMN-së dhe Qeverisë, kjo e fundit obligohet që brenda një periudhe prej pesë vjetëve të shpenzojë vetëm nga 5 për qind të mjeteve nga fondi i privatizimit, ndërsa pjesën tjetër ta ruajë për kreditorët dhe ndarjen e 20-përqindëshit për punëtorët e ndërmarrjeve shoqërore. /Telegrafi/