Rritja e normës tatimore, ATK pret të arkëtojë rreth 700 mijë euro

Ngritja e normës së tatimit prej 5 për qind në 9 për qind për veprimtaritë shërbyese është përcaktuar në Ligjin për ndryshimin dhe plotësimin e Ligjit për Tatimin në të Ardhurat Personale dhe Ligjin për ndryshimin dhe plotësimin e Ligjit për Tatimin në të Ardhurat e Korporatave, të cilat kanë hyrë në fuqi që nga data 15 qershor i këtij viti, ndërsa për qëllime praktike nga 1 korriku.

Kështu thotë zëdhënësja e Administratës Tatimore, Valentina Bytyqi-Sefa, duke sqaruar se për cilat biznese është ngritur kjo shkallë tatimore. “Ngritja e Normës prej 5 për qind në 9 për qind është bërë për bizneset që nuk paguajnë tatimin në baza reale, të cilat merren me veprimtari shërbyese, si: shërbimet, veprimtaritë profesionale, të zanatit, të argëtimit dhe të ngjashme”, tha ajo për Radio Kosovën.

Zëdhënësja e ATK-së sqaron se priten edhe të hyra shtesë nga norma e rritur e tatimit mbi të ardhurat e paragjykuara nga aktivitetet profesionale, respektivisht bizneset që merren me shërbime profesionale, vetëm nga bizneset që i nënshtrohen këtij lloj tatimi, respektivisht qarkullimi vjetor i të cilëve nuk tejkalon shumën prej 50 mijë euro. “Me ndryshimin e normës tatimore nga 5 për qind në 9 për qind, e cila ka filluar të implementohet nga muaji Korrik 2012, pritjet tona për të hyra shtesë deri në fund të këtij viti do të jenë rreth 0.7 milion euro, vetëm nga ky ndryshim, sepse këtë vit do të kemi vetëm një pagese të një kësti tremujor nga ky lloj ndryshimi të normës tatimore”, thekson Bytyqi-Sefa.

Të hyrat shtesë të projektuara për vitin 2013, nga ky lloj tatimi planifikohet të jenë rreth 3 milionë euro.

Ndryshe, ATK-ja sivjet pritet të mbledhë 288 milionë euro, kurse në periudhën janar – shtator ka mbledhur 203 milionë euro, apo 5 për qind më shumë se në periudhën e njëjtë të vitit të kaluar. /Telegrafi/