Rrokadë në PTK

Ish-ushtruesit të detyrës se kryeshefit ekzekutiv, dhe njëherësh drejtorit për financa në PTK, Nuredin Krasniqit, nuk i është vazhduar kontrata. Njëjtë është vepruar edhe me Sabajdin Ramaxhikun, të cilit nuk i është vazhduar marrëdhënia e punës për pozitën e sekretarit të korporatës. Ky i fundit që deri më tani ka mbajtur dy poste, tani do të jetë vetëm drejtor për çështje ligjore në PTK.

Për të dy këto pozita tashme është shpallur edhe konkursi.

I kontaktuar nga Expressi, Nuredin Krasniqi ka pranuar se nuk do të jetë më punëtor në këtë ndërmarrje, duke thënë se në rastin e tij, nuk ka pasur ndonjë problem me menaxhmentin e ri. Ai ka shpjeguar se largimi i tij është i ligjshëm, pasi i kishte skaduar kontrata.

Ndërkaq, zyrtari i pozitës se dytë nuk është pushuar krejtësisht nga puna, pasi mban një pozitë tjetër në PTK.

Në konkursin e shpallur nga PTK-ja, thuhet se në këto pozita Korporata po kërkon njerëz me dinjitet dhe të kualifikuar. Aty thuhet se konkursi është shpallur në bazë të vendimit të datës 28.06.2012, bazuar në Ligjin për ndërmarrje publike. Dy pozitat e shpallura me konkurs janë ajo e “Zyrtarit kryesor të financave dhe thesarit” dhe pozita e “Këshilltarit të përgjithshëm apo sekretarit të korporatës”.

Megjithatë, burime të gazetës brenda Korporatës kanë shpjeguar se ndërrimi i shpeshtë i zyrtarëve të lartë, sa herë ndërrohet kryeshefi, është bërë gati se dukuri normale. Edhe në rastin e kryeshefit të ri thonë se nuk është më ndryshe.

Një rast tjetër i kësaj “rrokade” në PTK ishte edhe ajo e menaxherit për çështje legale në korporatë, Xhevdet Smakiqi. Ai pati akuzuar kryeshefin e ri se me një vendim të paligjshëm e kishte larguar nga puna. Megjithëkëtë, nuk kaloi shumë kohë dhe Smakiqi u emërua menaxher i përgjithshëm për marketing dhe shitje në PTK.

Ndryshe, konkursi për pozitat e drejtorit të financave dhe sekretarit të korporatës, do të jetë i hapur për aplikantët deri më 6 gusht. /Telegrafi/