Sektori i drurit me vlera milionëshe

Zëvendëskryeministrja Mimoza Kusari-Lila ka bërë thirrje tek të gjithë konsumatorët që të vizitojnë panairin dhe të shikojnë prodhimin kosovar. “Prodhimi dhe tregtia që të dyja janë elemente shumë të rëndësishme të ekonomisë së Kosovës, por prodhimi i Kosovës gjithashtu duhet favorizuar nga konsumatori por edhe duhet siguruar se e ka konkurrencën e barabartë në treg karshi edhe produkteve të tjera të importuara. Prandaj, dua t’ju them se po e shikojmë edhe bilancin e eksporteve të Kosovës, edhe pse jo në sasi aq do të kishim dëshiruar, në kualitet ka filluar të përmirësohet”, tha ajo.

Ndërsa, ministri i Bujqësisë, Blerand Stavileci, ka thënë se ky panair është dimension i rëndësishëm për të promovuar produktet vendore dhe për të forcuar relacionin prodhues-konsumator. Sipas tij, industria e përpunimit të drurit kontribuon shumë edhe në GDP, edhe në punësim. “Industria e përpunimit të drurit është njëra nga më të suksesshmet, mjafton të shihen këto prodhime, mjafton të shihet numri i të punësuarve brenda sektorit”, tha ai.

Drejtoresha e USAID-it, Maureen A. Shauket ka thënë se që shtatë vite mbështesin këtë industri në shumë mënyra, dhe sipas saj, mobilet apo orenditë e prodhuara në Kosovë mund të zënë vendin kudo në regjion. “Të arriturat që janë bërë vetëm gjatë viteve të fundit janë mjaft mbresëlënëse, në vitin 2009 vlera e sektorit të përpunuesve të drurit ishte 40 milionë euro, kurse sot vlera e këtij sektori ka arritur më se 80 milionë euro, dhe mund të them se rritja në vlerë kaq të madhe paraqet një sukses jashtëzakonisht të madh”, pohoi ajo.

Ndërsa, drejtori i Shoqatës së Përpunuesve të Drurit të Kosovës, Hashim Deshishku, ka pohuar se vetëm në vitin 2011 eksporti i materialit të drurit dhe plastikës ka qenë 119 milionë, që sipas tij, çdo vit po bie shifra e importit.
Panairi ‘Natyra 2012’ këtë vit mbahet për herë të shtatë me radhë, duke u shndërruar kështu në një panair tradicional. /Telegrafi/