Sharp shkurton 5000 vende pune
Kompania japoneze, Sharp Corporation, deklaroi në ditën e sotme se do të shkurtojë 5 mijë vende pune në filialet e saj anembanë globit, për vitin fiskal që përfundon në Mars të 2013. Kjo shifër përfaqëson 10 për qind të të gjithë fuqisë punëtore të Sharp dhe është shkurtimi i parë që pas Luftës së Dytë Botërore. “Deri në fund të Marsit të 2013, do të largojmë nga puna përafërsisht 5 mijë persona.
Në lidhje me detajet, ne do të diskutojmë edhe me unionin e punëtorëve mbi mënyrën sesi do të procedojmë”, tha Presidenti i Sharp Takashi Okuda. Sharp Corporation, që publikoi humbjet më të mëdha neto në një shekull, ka njohur një rënie të fuqishme të shitjeve të televizorëve. Presidenti i Sharp, Takashi Okuda, e cilësoi këtë vendim si tepër të vështirë, por të domosdoshëm. “Në tremujorin e dytë, Sharp publikoi humbje neto prej 94 miliardë yen, ose 1.2 miliard dollarë, pasi industria japoneze e elektronikës, nuk i rezistoi konkurrencës së jashtme.
Pas këtyre shifrave negative erdhi edhe reagimi i agjencisë së vlerësimit të kreditit, Moody’s, që zhvlerësoi nivelin e borxhit afatshkurtër të Sharp, në Prime-3, nga Prime-2 që ishte më parë. Gjithashtu, më herët edhe agjencia japoneze e vlerësimit të kreditit, e kishte zhvlerësuar Sharpin me 2 nyje, në A-, nga A+ që ishte më parë. Performanca e dobët bëri që aksionet e Sharp në bursën e Tokyos të shënojnë rënie me rreth 30 për qind në sesionin e sotëm. /Telegrafi/
