Shoferët e autobusëve bllokojnë magjistralen
Shoferët e autobusëve të Mitrovicës, të martën, kanë hyrë në grevë duke bllokuar magjistralen Mitrovicë-Prishtinë tek fshati Pestovë i Vushtrrisë, për shkak të kombibusëve, të cilët, siç pohojnë ata, po ua marrin udhëtarët. Murat Tahiri, shef i stacionit të autobusëve në Mitrovicë, tha se që nga dita e premte e javës së shkuar, asnjë autobus nuk ka qarkulluar nga Mitrovica në drejtim të Prishtinës dhe Skënderajt për shkak se kombibusët po ua marrin udhëtarët.
Sipas tij, të hënën është mbajtur një mbledhje urgjente rreth kësaj çështje me shefin e inspektoriatit të Mitrovicës dhe të inspektoriatit të Ministrisë së Transportit, por nuk është arritur asnjë rezultat konkret. “Greva do të vazhdojë deri në realizimin e kërkesave tona dhe të gjendet një zgjidhje”, tha Tahiri.
Në anën tjetër, Lulzim Zeqiri, kryeinspektor në Mitrovicë, ka bërë të ditur se ata janë takuar dy herë me përfaqësues të stacionit të autobusëve dhe janë duke punuar intensivisht për zgjidhjen e këtij problemi.
“Vetëm gjatë ditës së premte ne kemi shqiptuar 14 gjoba për vozitësit e kombibusëve dhe jemi duke vazhduar punën tonë në këtë drejtim”, tha për Kosovapress Zeqiri, duke kërkuar ndihmën edhe të Ministrisë së Transportit dhe policisë, meqë kompetencat e tyre janë të kufizuara vetëm në territorin e komunës së Mitrovicës. /Telegrafi/
