Sigurimi i KEK-ut, rasti deri në Gjykatën Supreme
Tenderi për sigurimin e objekteve të KEK-ut vazhdon të jetë temë aktuale. Kompania e sigurimeve “BesaSecurity” me këmbëngulësi thonë se në këtë tender ka pasur shkelje të mëdha. Sipas tyre, është shkelur Ligji i Shërbimeve Private të Sigurisë, Ligji për Prokurim Publik dhe Udhëzimi Operativ i Prokurimit.Përfaqësues të kompanisë “Besa Security” i kanë bërë thirrje drejtorit të KEK-ut, Arben Gjukaj që të mos e nënshkruaj kontratën me konzorciumin Security Code dhe WDG, të cilët kanë fituar tenderin, shuma e të cilit arrin rreth gjashtë milionë euro.
Granit Hasani, drejtor gjeneral në kompaninë e sigurimeve “BesaSecurity” ka thënë se do t’i drejtohen edhe Gjykatës Supreme. “Nuk do të ndalemi, për t’u ankuar edhe në institucionet e tjera përkatëse për drejtësi të cilat besojë se së shpejti me punën e tyre do të vinë në realizimin e të drejtave tona si kompani”, tha ai.
“Kjo ka filluar nga disa institucione, duke filluar nga vet autoriteti kontraktues, Komisioni i Rivlerësimit, nga KRPP-ja, si dhe nga OSHP-ja, sepse me vendimet e tyre kanë shkelur ligjet në anën tjetër që janë përkatëse për kompanitë e sigurimeve”, theksoi Hasani.
Ndërsa, Skender Sopjani, menaxher në kompaninë “Rojet e Nderit”, e cila ka qenë një nga kompanitë konkurruese, tha se OSHP-ja këtë tender nuk e ka kthyer fare në rivlerësim. “Gjithë kjo histori e prokurimit besojmë se ka ardhur me qëllim të caktuar , për t’u arritur një nënshkrim kontrate në ndonjë interes të një personi apo individi të caktuar. Nëse kjo kontratë do të nënshkruhet nga ndonjë kopani e papërgjegjshme, ne do të vazhdojmë ne procedura ligjore në të gjitha instancat”, theksoi Sopjani, raporton Koosvapress.
KEK-u ka gjithsej 91 objekte për ruajtje për t’u vëzhguar në mënyrë elektronike.
Sipas “BesaSecurity”, në këtë konzorcium fitues ka kanë mungesë të licencës dhe se në këtë proces ka mos-përmbushje të nënkritereve. /Telegrafi/
