Spiegel: BQE, me kufi për interesin e bonove

Kufiri do të vendoset mbi bazën e një diference tavan që do të kenë bonot e anëtarëve të Eurozonës, në raport me bonot e Gjermanisë. Një vendim i tillë pritet të shkurajojë spekulimin me bonot sovrane të Eurozonës. Raportimi u bë nga revista e përjavshme “Spiegel”, e cila duke ju referuar burimeve tha se një vendim i tillë pritet të diskutohet dhe të merret në takimin që banka do të zhvillojë në fillim të muajit shtator. Vendosja e kufirit do të jetë një sinjal i qartë për lojtarët e tregut se cili është interesi që banka qendrore vlerëson si të pranueshëm.

Zyrtarisht Banka Qendrore Europiane nuk ka bërë asnjë reagim për këtë raport. Nëse do t’i referohemi deklaratave të presidentit Mario Dragi në fillim të muajit, mund të rezultojë që raporti i revistës gjermane të jetë i vërtetë. Dragi në një komunikim me mediat ka dhënë garanci se, banka është e vendosur të kryejë çdo veprim dhe të paguajë çdo faturë që garanton se Eurozona nuk shpërbëhet. Ai sinjalizoi se pjesë e këtij programi është edhe blerja e bonove të Spanjës dhe Italisë. Ai tha se ndërhyrjet do të kryhen vetëm në rast se kjo do të kërkohet nga qeveritë, ndihmë që do realizohet në këmbim të disa kushteve.

Sipas “Spiegel”, vendosja e tavanit për interesat e bonove jo vetëm që kontrollon koston e financimit por paralelisht garanton se në eurozonë nuk ka ndryshime të mëdha të interesave. Revista “Spiegel” raportoi gjithashtu se, Banka Qendrore Europiane do të rrisë transparencën në blerjet e bonove dhe planifikon të publikojë volumin e bonove që ka blerë menjëherë pasi është realizuar veprimi. Në kushtet aktuale banka publikon çdo ditë të hënë volumin e blerjeve të një jave më parë. /Telegrafi/