Stop privatizimit
Disa qytetarë kanë protestuar të enjten në Prishtinë kundër privatizimit të ndërmarrjeve publike përfshirë këtu Post-Telekomin e Kosovës, Korporatën Energjetike, si dhe likuidimin e Trepçës. Protestuesit kanë kërkuar nga autoritetet e Kosovës që të ndërprerjen privatizimin e këtyre ndërmarrjeve, pasi që, siç thonë ata, ky privatizim nuk po bëhet në momentin e duhur dhe po e rëndon edhe më tepër gjendjen ekonomike të popullatës së Kosovës.Kryetari i Këshillit organizativ të protestës, Alush Sejdiu ka thënë se disa nga kërkesat e tyre është të rishikohet procesi i privatizimit dhe të shihen efektet e privatizimit.
Sejdiu ka theksuar më pas se kërkojnë nga Kuvendi i Kosovës që të debatohet procesi i privatizimit të ndërmarrjeve shoqërore, dhe më pas të gjendet një mënyrë e privatizimit. “Të ndërpritet çdo proces i privatizimit deri në përfundimin e vlerësimit të komisionit parlamentar për këtë çështje, të ndërpritet çdo procedurë e nisur për likuidimin e Trepçës. Ne presim që këto kërkesa të merren në konsideratë dhe jo që deri më tani askush nuk është marrë më këto kërkesa”, theksoi ai.
Protesta e sotme, e organizuar nga Bashkimi i Sindikatave të Pavarura të Kosovës bëhet pas mbledhjes së mbi 61mijë nënshkrimeve të qytetarëve kundër privatizimit të ndërmarrjeve publike.
Kryetari i Bashkimit të Sindikatave të Pavarura të Kosovës, Haxhi Arifi iu ka drejtuar protestuesve duke thënë se Qeveria e Kosovës ka anuluar nënshkrimin e kontratës me konsorciumin fitues “Limak&Çalik” të distribucionit të Korporatës Energjetike të Kosovës.
“Pikërisht na gëzon fakti që është ngritur vetëdija që të na kuptojnë se në këto nuk i bëjmë për veten tonë, por i bëjmë për punëtorët, për popullin që jeton në Kosovë. Ata janë të zgjedhurit e popullit dhe ata duhet të kenë përgjegjësinë për këtë popull. Ne mbesim me shpresë se edhe të tjerat marrëveshje nuk do të bëhen pa neve”, thekson Arifi. /Rel/Telegrafi/
