Thatësia ulë ‘bereqetin’
Thatësia e madhe si rezultat i temperaturave të larta dhe mungesës së shiut, kanë shkaktuar dëme në të gjitha kulturat bujqësore edhe në Kosovë. Një ndër shkaqet e uljes së rendimentit të grurit këtë vit, vlerësohet të jenë temperaturat e larta. Isuf Çikaqi, drejtor i Departamentit të Prodhimtarisë dhe Mbrojtjes së Bimëve në MBPZHR, tha për “Tribuna Shqiptare” se temperaturat e larta që kanë mbretëruar gjatë këtyre ditëve dhe mungesa e reshjeve të shiut, kanë ndikimi negativ si në rendiment. “Realisht temperaturat e larta dhe mungesa e shiut te çdo kulturë bujqësore e kanë ndikimin e vetë pa përjashtim. Në gjendje më të mirë janë ato kultura që janë mbjellë në ato toka që janë nën sistemin e ujitjes, mirëpo prapë se parë pavarësisht ujitjes, temperaturat e larta ndikojnë në zhvillimin tek të gjitha bimët”, pohoi Çikaqi.
Ai ka thënë se ministria nuk ka ende shifër zyrtareve të dëmeve që janë shkaktuar, pasi që ekipet në terren janë duke i bërë vlerësimet. “Ajo çka mund të dimë tash është se rendimentet e grurit janë më të ulëta se sa vitin e kaluar. Vitin e kaluar kemi pas rendimente rekorde prej 4600 kilogramë për hektar, ndërsa këtë vit kemi rendiment mesatar prej 4050 kilogram, që i bie nja ulje e rendimentit prej rreth 550 kilogram për hektar”, tha Çikaqi.
Megjithatë, ai ka thënë se në total prodhimtaria e grurit është më e lartë në krahasim me vitin e kaluar, pasi që sivjet ka pasur më shumë sipërfaqe të mbjella më grurë. “Vitin e kaluar i kemi pasur 357 mijë e 433 tonë me grurë, ndërkaq sivjet kemi 382 mijë e 950 tonë”.
Ndryshe, me të njëjtin problem nga temperaturat e larta janë përballur edhe vendet e rajonit dhe me gjerë. Të gjitha vendet e rajonit kanë raportuar për humbje të konsiderueshme në bujqësi si pasojë e temperaturave të larta. Si pasojë e kësaj, në Serbi është paralajmëruar rritja e çmimit të bukës nga muaji shtator, megjithëse ky shtet vlerësohet si ‘hambari’ i Ballkanit për sasinë e grurit. /Telegrafi/
