U mbajt panairi “Javët e Biznesit Kombëtar”
Për nder të 100 vjetorit të pavarësisë së Shqipërisë dhe në kuadër të 134 vjetorit të Lidhjes Shqiptare të Prizrenit, në këtë qytetet është mbajtur panairi “Javët e Biznesit Kombëtar”, i organizuar nga Aleanca Kosovare e Bizneseve të Kosovës. Disa kompani prodhuese nga vise të ndryshme të Kosovës, kanë ekspozuar paraditen e së dielës prodhimet e tyre në Shatërvan. Prodhuesit ofruan prodhime cilësore për konsumatorët gjatë këtij promovimi rajonal. Ky projekt me panaire do të mbahet në të gjitha trevat shqiptare, transmeton Kosovapress.
Përveç në Kosovë, prodhimet shqiptare do të promovohen edhe në Shqipëri, Maqedoni, Kosovë Lindore e Mali të Zi.
Qëllimi i “Javëve të Biznesit Kombëtar” është zgjerimi rajonal dhe konsumimi nga shqiptarët i prodhimeve shqiptare.
Moto kryesore e projektit kombëtar “Javët e Biznesit Kombëtar”, është festo 100 vjetorin e pavarësisë me prodhime shqiptare. /Telegrafi/
