UNDP me projekt punësimi në Kosovë
Programi i Kombeve të Bashkuara për Zhvillim (UNDP) ka lansuar një publikim të ri në takimin e Bordit Ekzekutiv në selinë në Nju Jork, publikim ky që tregon arritjet transformuese të zhvillimit në vendet e Evropës Lindore dhe Azisë Qendrore.Pjesa më e madhe e këtyre sukseseve janë të bazuara në politikat e reja inovative sociale që adresojnë nevojat e të varfërve dhe të margjinalizuarve në këtë rajon, përfshirë romët, të rinjtë, të papunët afatgjatë dhe njerëzit me aftësi të kufizuar.
Publikimi ofron shembuj të gjallë të strategjive që synojnë avansimin e objektivave sociale, ekonomike dhe mjedisore. Si rezultat i këtyre strategjive shpeshherë inovative, UNDP – gjithmonë në partneritet me qeveritë, sektorin privat dhe shoqërinë civile – ka ndihmuar në krijimin e vendeve të punës, në plotësimin e nevojave të grupeve më të prekura, menaxhimin në mënyrë të përgjegjshme të mjedisit dhe në sigurimin për parandalimin dhe riaftësimin pas krizave dhe fatkeqësive.
Njëra nga storiet e publikuara është edhe ajo e projektit të punësimit (ALMP) të UNDP-së në Kosovë. Edhe fotoja e përzgjedhur për kopertinë është marrë nga po i njëjti projekt. /Telegrafi/
